Nutaarsiassat


2019 2018 2017 Flere år...

29-08-2019

Qernertanik qilalugartassiissutit pillugit Aalisarnermut, Piniarnermut Nunalerinermullu Ataatsimiititaliamit Piniarnermut Naalakkersuisumut kaammattuut

Aalisarnermut, Piniarnermut Nunalerinermullu ataatsimiititaliami ilaasortat amerlanerussuteqartut Siumumeersut, Inuit Ataqatigiinneersut, Partii Naleqqameersut Atassummeersullu KNAPK’p Qaanaami aamma Savissivimmi qernertanik qilalugartasseeqqittoqarnissaanik qinnuteqaataat taperserpaat piumasaqaatigalugulu, Naalakkersuisut piaarnerpaamik atuisut peqatigalugit ajornartorsiummik aaqqiissuteqassasut. 

 

Ataatsimiititaliap kissaatigaa, Qaanaami ileqqutoqqat malillugit piniartarneq attatiinnarneqarlunilu illersorneqassasoq.

 

Ataatsimiititaliami amerlanerussuteqartut Naalakkersuisunut kaammattuutigaat Ittoqqortoormiut, Tasiilap aamma Upernaviup eqqaanni najugaqartut peqatigalugit qilalukkanik qernertanik pisasseeqqittoqarsinnaaneranut periarfissat misissoqqullugit.

 

Peqatigitillugu pisasseeqqinnerit pillugit akulikitsumik oqallisiginnilluni ilungersunartumik inissittarneq pinaveersaarniarlugu iliuuseqaqqullugit ataatsimiititaliap Naalakkersuisut kaammattussavai. Tamanna ilaatigut puisit amiinik tunitsiveqarnikkut pissutsinik pitsanngorsaanikkut anguneqarsinnaavoq.

 

Ataatsimiititaliap ataatsimut isigalugu kissaatigaa, pisasseeqqinnissat pillugit oqallinnerit uteqqiattumik ajornartorsiutaassanngitsut piumasaqaatigalugulu Naalakkersuisut ajornartorsiummik taassuminnga uteqqiattumik unitsitsisinnaasumik piaartumik iliuuseqassasut.

 

Ataatsimiititaliami ikinnerussuteqartut Demokratineersut ima oqaaseqaateqarput: 

 

”Pisassiissutinik amerliliinissamik Naalakkersuisut suliniuteqartariaqarnerat pillugu Demokratit tunngaviatigut isumaqataapput. Maannakkulli pisassiissutit amerlineqarsinnaanerisa illersorneqarsinnaanerat Demokraatinit isumaqataaffigineqanngilaq. Tamatumani tunngavigineqarluni, Naalakkersuisut piffissami matumani qaffaanissamut itigartitsinerminni innersuussutigimmassuk, ukiumut 2019-mut  piniagassanut allanut pisassiissutit suli sinneqarmata minnerunngitsumillu tuttunik umimmannillu pisaqarnissamut suli periarfissaqarmat.

 

Maannakkut pisassiissutinik amerliliineq Kalaallit Nunaata inissisimaneranik nukittorsaataanani uppernassuseqarneranik nukillaarsaataassaaq. Taarsiullugu Demokraatit Naalakkersuisunut sakkortuumik kaammattuutigissavaat piniartut Pinngortitaleriffillu suleqatigalugit suleqatigiinnermik aallartitseqqullugit.

 

Suleqatigiinneq nunatta avannaani kangianilu pisassiissutit kingusinnerusukkut amerlineqarsinnaanerat pillugu nunat tamat akornanni pisassiissutinik agguaassisarnermi susassaqartut akornanni paasinninnermik pilersitsissaaq.“

 

Henrik Fleischer

Aalisarnermut, Piniarnermut Nunalerinermullu ataatsimiititaliami siulittaasoq

Paasisaqarnerujumagaanni siullittaasup oqarasuaataanut +299 52 72 82 attaveqartoqarsinnaavoq