Nutaarsiassat


2019 2018 2017 Flere år...

09-04-2019

Pingasunngornermi akunnermi apeqquteqarfimmi partiit siuttuisa apeqqarissaarnerannik 1. maj misiligummik aaqqissuussinissaq

Akunneq apeqquteqarfik ataaseq partiit siuttuisa apeqqarissaarnerattut misiligutitut ingerlanneqassasoq Suleriaaseq pillugu Ataatsimiititaliamit akuerineqarpoq. Partiit siuttuisa apeqqarissaarnerat ingerlanneqassaaq ulloq 1. maj.

 

Partiit siuttuisa apeqqarissaarneranni tunngavissat

Partiit siuttuisa apeqqarissaarneranni tunngavigineqarpoq partiit siuttuisa tamarmiusut, aamma Naalakkersuisuusut, Naalakkersuisutuunngitsoq partiimulli siuttutut peqataanissaat.

 

Tassa partiit siuttui Naalakkersuisuusut, Naalakkersuisutut Naalakkersuisunullu sinniisutut peqataanatik, partiit siuttuattut peqataassapput. Tamatuma kingunerisaanik partiit siuttuisa sinneri partiit siuttuinut, Naalakkersuisutut suliassaqarfiinut apeqquteqarnatik, partiit politikerisaat taamaallaat pillugit apeqquteqarsinnaapput.

 

Suleriaaseq pillugu Ataatsimiititaliamit erseqqissassallugu pingaaruteqarpoq partiip siuttuata aamma Naalakkersuisuusup partiit siuttuisa apeqqarissaarneranni oqaaseqaatai, Naalakkersuisutut atuuffik sinnerlugu oqaaseqaataanatik partii sinnerlugu oqaaseqaatitut taamaallaat isigineqarsinnaammata.

 

Partiit siuttuisa apeqqarissaarnerannik Inatsisartut ataatsimiittarfianni ingerlatsineq

Partiit siuttui arfineq marluk (imaluunniit partiip siulittaasua ilaasortaanngippat partiip gruppiani Inatsisartunut ilaasortaatitaat) ataatsimiittarfimmi naapissapput Inatsisartunut malittarisassarititaasut iluini naalakkersuinikkut oqallinnissamut.

 

Maanna naalakkersuisuutitaqartut illuatungiliuttullu imminnut akerleriittutut inissisimasarnerannut taarsiullugu partiit siuttuinik oqallitsitsineq oqalliseriaatsimik nutaamik, partiit siuttuisa partiip isummersuutaannik nassuiaateqarnerannik imaqartumik pilersitsiniarneruvoq.

 

Taamaalillunilu qulequtarineqartussat siumut aalajangeriigaassanngillat, taamaattumillu partiit siuttuisa ataasiakkaat suut oqaluuserissanerlugit namminneq aalajangigassaraat.

 

Partiit siuttuisa apeqqarissaarneranni Inatsisartunut ilaasortat sinneri apeqquteqarsinnaanngillat, taamaattumillu ataatsimiittarfimmi issiavimminni issianissaat naatsorsuutigineqarani.

 

Partiit siuttui oqaluttarfimmit saqqummiinissamut minutsinik marlunnik aallaavittut periarfissinneqarsinnaapput.

 

Tamatumalu kingorna partiit siuttuisa sinneri arfinillit partiip siuttuanut oqaluttarfimmiittumut 2 x ½ minutsimi oqaaseqarnissamut periarfissinneqassapput. Taamatuttaaq partiip siuttua oqaluttarfimmiittoq akissuteqarnissamut minutsimik affarmik periarfissaqassaaq.

 

Partiit siuttuisa apeqqarissaarnerat kingusinnerpaamik akunnerit marluk qaangiunneranni naammassineqariissaaq.

 

 

Siulittaasoqarfik sinnerlugu

 

Vivian Motzfeldt

Inatsisartut Siulittaasuat