Nutaarsiassat


2020 2019 2018 Flere år...

24-08-2020

Nunat Avannarliit Killiit Siunnersuisoqatigiiffiata 2020-mi ukiumoortumik ataatsimiinnissaa kinguartinneqartoq

Nunat Avannarliit Killiit Siunnersuisoqatigiiffiata 2020-mi ukiumoortumik ataatsimiinnissaa, Reykjavikimi, Altingimi ulluni 15.-16. septembar 2020-mi pisussaq, Covid 19 ip ajornartorsiortitsineranik kiisalu Islandimut angalaniarnernut killilersuutinik sukateriffigineqartunik pissuteqartumik kinguartinneqassasoq Siulittaasoqarfianit aalajangiunneqarpoq.

 

Peqatigitillugu ukiumoortumik ataatsimiinnerup 2020-mi ukiakkut ingerlanneqarnissaa Nunat Avannarliit Killiit Siunnersuisoqatigiiffiata Siulittaasoqarfianit aalajangiunneqarpoq, tamanna oktobarimi pinngikkuni novembarimi. Nalunartut atuuttut pissutigalugit Siulittaasoqarfik aalajangersimasunik ulluliinani ukiaanerani pissutsit pitsaanerulernissaat neriuutigalugu utaqqimaarniarpoq, taamaattoqarsinnaapput peqataasussat ukiumoortumik ataatsimiinnermut Reykjavikimi naapissinnaassallutik. Piffissami nutaami ukiumoortumik ataatsimiinnissamut aggeqqusissutit kingusinnerpaamik ataatsimiinnissaq sapaatip akunnerinik sisamanik sioqqullugu nassiunneqarumaarput.

 

Nalinginnaasumik ukiumoortumik ataatsimiittoqarsinnaanera suli ajornakusuussasoq paasinarsissagaluarpat, ajornartorsiutit atuukkaluartut najuulluni ukiumoortumik ataatsimiittoqarsinnaanera anguniarlugu killilersuutinik pisariaqartinneqartunik atuutilersitsiniarluni Siulittaasoqarfik sapinngisaminik ilungersuuteqassaaq. Alaatsinaatsut killilerneqarnerat, ataatsimiittarfimmik allamik atuineq, ataatsimiinnerup sivisussusaanik killiliineq, saniatigut aaqqissuussinernik (nereqatigiinnernik, angalaarunneqarnernik) taamaatitsineq tamatuma nassatarisinnaavai, immaqaluunniit ajornerpaaffiani qarasaasiakkut attaveqaatitigut ataatsimiittariaqarneq, tamannali allatut iliornissaq ajornavikkaangat aatsaat iluarsiissutaasassaaq.

 

Nunat Avannarliit Killiit Siunnersuisoqatigiiffiata allatseqarfia Altingi nunanillu aallartitat suleqatigalugit ukiumoortumik ataatsimiinneq kinguartinneqarsimasoq pillugu pilersaarusiussaaq, matumani ilaatigut nutaamik piffissaliinissaq pillugu. Oqaatigineqareersutut ukiap ingerlanerani Covid 19-ip ajornartorsiortitsinerata nunanilu avannarlerni killerni, ingammillu Islandimi angalaniarnikkut killilersuutit ineriartornerat erseqqinneruleriarpata aatsaat nutaamik piffissaliisoqarsinnaassaaq.

 

Naggasiutigalugu erseqqissaatigineqassaaq Nunat Avannarliit Killiit Siunnersuisoqatigiiffiata 2020-mi ukiumoortumik ataatsimiinnissaa qanorluunniit pisoqaraluarpat taamaatinneqassanngimmat.

 

 

Nunat Avannarliit Killiit Siunnersuisoqatigiiffiat sinnerlugu:

 

Guðjón S. Brjánsson, Nunat Avannarliit Killiit Siunnersuisoqatigiiffiata Siulittaasua

Henrik Old, Nunat Avannarliit Killiit Siunnersuisoqatigiiffiata Siulittaasuata tullia siulleq

Vivian Motzfeldt, Nunat Avannarliit Killiit Siunnersuisoqatigiiffiata Siulittaasuata tulliata aappaa

 

 

 

Paasisaqarnerujumalluni saaffissaq:

 

Sigurdur Olafsson, Allattaaneq, Nunat Avannarliit Killiit Siunnersuisoqatigiiffiat, sigurduro@althingi.is, oqarasuaat: +354 6629922