Nutaarsiassat


2020 2019 2018 Flere år...

28-07-2020

Inatsisartunut ilaasortaasimasoq Suka K. Frederiksen toqukkut qimaguppoq

Inatsisartunut ilaasortaasimasoq Suka K. Frederiksen ulloq 21. juuli toqukkut qimagussimasoq aliatsaatigingaarlugu tusarparput.

 

Suka K. Frederiksen novembar 2014-imi qinersinermi Inatsisartunut qinigaavoq. Suka K. Frederiksen 2018-imi qinersinermi qinigassanngortinniarnani toqqarpaa, Naalakkersuisuunermi nalaani nappaassuarmik kræftimik nassaarfigineqarsimanera tamatumunnga pissutaasut ilagaat.

 

Suka K. Frederiksen 2016-imi Naalakkersuisunut ilaasortatut qinigaavoq, 2018-imilu qinersinerup tungaanut Naalakkersuisunut ilaasortaalluni.

 

Suka K. Frederiksenip naalakkersuinikkut sulinera, piffissami 2005-imiit 2009-mut Narsami kommunalbestyrelsemut ilaasortaanermik aallartippoq.

 

Suka K. Frederiksen suliumatussuseqarsimaqaaq, tamanna aamma nappaammik eqqorneqarnermi paasineqarnerata kingorna, inoqatinimi nappaammik ilungersunartumik eqqorneqartut tarnikkut timikkullu nukissanik tuniumallugit atuakkiorsimavoq.

Nammineerluni suliumatussuseqarsimaqaaq peqqissumillu inooriaaseqarnissaq assut pingaartissimallugu, killissanilu tikillugu akiuuttuarsimalluni. 

 

Suka K. Frederiksenip uini Sofus, meeqqatik sisamat, ernuttani, taakkulu ilaqutaat qimatarai. Suka K. Frederiksenip ilaqutai tamaasa qamannga pisumik misiginneqatigaakka isummakkullu najorlugit.

 

Eqqaaneqarnera ataqqinartuuli.