Nutaarsiassat


2020 2019 2018 Flere år...

03-04-2020

Gerhardt Petersenimut eqqaaniut

Inatsisartut Siulittaasuat Vivian Motzfeldtimit

 

Inatsisartunut ilaasortaasimasoq Gerhardt Petersen, piffissami sivisuumi kræftimik
nappaateqareerluni 64-inik ukioqarluni Qaqortumi ulloq 30. marts 2020-mi toqukkut
qimaguppoq.


Gerhardt Petersen angerlarsimaffimmi ningiumit Apollonie Thomsenimit erniuvoq,1955-imi ulloq 13. april Narsami inunngortoq.


Gerhardt Petersen 1976-imi niuernermut ilinniarnermini angusilluni naammassivoq taamanikkullu Kongelige Grønlandske Handelimi (KGH) handelsassistentitut
atorfinilluni.

 

Taamanili atorfeqarnermigut qaffakkiartuinnarsimavoq, KGH-p naalagaaffiup ataani suliffeqarfiunermiit, oqaluttuarisaanermi tunngavimmigut ullumikkut nalunngisatsitut KNI-nngorluni annertuumik allanngoriartornerata nalaani 1988-imi handelschefinngorluni.

 

Qularnanngitsumik malittuanik KNI-p
allanngortiterneqarnerani Gerhardt Petersenip aqutsisutut piginnaasaqarnera
sunniutilimmillu suleqataajumatunera KNI-p suliffeqarfissuarmi pisortaaneratut 1992-
imi toqqarneqarneranut pissutaaqataasimassapput.


Innuttaqatimi inuuniarnermikkut atugaannik pitsanngorsaaniarluni qasusuilluni
sulisimavoq, tamannalu pingaartumik suliffeqarfissuarmi pisortaanerunermini
pitsanngorsaatinik arlalissuarnik suliniuteqarnerani ersiuteqarsimavoq.


Assersuutigalugu nunaqarfinni avinngarusimasunilu pisiniarfeqarnikkut
annertusaanerit siuuttuuffigisimavai, soorluttaaq niuernikkut kiffartuussinikkullu
ilinniartitaanerit assigiinngitsut, nunap nammineq pisuussutaasa
niuerutigineqarnerisa annertusiartornera ilutigalugu ineriartortinneqartut
siuuttuuffigisimagai.


Gerhardtip inuiaqatigiinnut kalaallinut iluaqutaasumik suliniuterpassui assigiinngitsut
immikkut ittut tunngavigalugit Namminersornerullutik Oqartussat
Nersornaasiuttagaannik sølviusumik ulloq 8. april 2000-imi nersornaaserneqarpoq.


Gerhardt Petersen aamma 2009-mi partiimut Atassummut siulittaasunngorpoq
piffissamilu 2013-imiit 2014-imut Inatsisartuni sinniisutut ilaasortaalluni.


Nulia, meerai ilaqutaalu qamannga pisumik misiginneqatigaakka.


Eqqaaneqarnera ataqqinartuuli.