Nutaarsiassat


2022 2021 2020 Flere år...

28-03-2022

Sap. ak. 13-imi Inatsisartuni ataatsimiinnerit tamarmik kinguartinneqarneri

Inatsisartut ataatsimiittarfianni ataatsimiinnerit sapaatip akunneranit 13-imit sapaatip akunneranut tullermut kinguartinneqarnissaannik Naalakkersuisut Siulittaasuannit qinnuteqaammik ullumi tassanngaannartumillu Siulittaasoqarfik tigusaqarpoq.

 

Qitiusumik allaffeqarfimmi qarasaasiaqarnikkut isumannaallisaanikkut ajutoortoqarsimanera innersuussutigalugu Inatsisartut ataatsimiittarfianni ataatsimiinnerit kinguartinneqarnissaannik Naalakkersuisut siulittaasoqarfimmut qinnuteqarput. Suliassat oqaluuserisassanngortinneqarsimasut eqqarsaatigalugit paasissutissanik attuumassutilinnik tamanik Inatsisartut pissarsisinnaanissaata qularnaarneqarnissaa eqqarsaatigalugu Naalakkersuisut ajornartorsiuteqarnerat tamatumunnga pissutaavoq.

 

Siulittaasoqarfiup sapaatip akunnerata aggersup ingerlanerani upernaakkut ataatsimiinnermut oqaluuserisassat naleqqussassavai upernaakkullu ataatsimiinnerup sapaatip akunnera 22 ilanngullugu sivitsorneqarnissaa naatsorsuutigineqartariaqarluni.

 

Taamaalilluni sapaatip akunnera una Inatsisartut ataatsimiittarfianni ataatsimiittoqassanngilaq, soorlu aamma ataatsimiititaliat sulinerat Naalakkersuisuni qarasaasiaqarnikkut isumannaallisaanikkut ajutoortoqarneranit eqqorneqassasoq.

 

Sapaatip akunnerata ingerlanerani oqaluuserisassat nutartikkat nassiunneqarumaarput oqaluuserisassanilu allannguutit Inatsisartut nittartagaanni takuneqarsinnaassallutik.

 

 

Inussiarnersumik inuulluaqqusillunga

 

Hans Enoksen

Inatsisartut siulittaasuat