Nutaarsiassat


2021 2020 2019 Flere år...

29-06-2021

Ilaqutariinnermut Peqqissutsimullu Ataatsimiititaliap ataatsimoorussamik sammisat isumaqarluartut ataatsimoornerlu pingaartillugit aasaanerani inuit sulinngiffeqarluarnissaannik kissaappaai

Innuttaasut kikkulluunniit tamarmik inuttut ataasiakkaatut, aammali ataatsimoorneq pingaartillugu, sapinngissamik pitsaanerpaamik ulluinnarni inuuneqarnissaat ataatsimiititaliap qaqugukkulluunniit sulissutigiussavaa.

 

Nunatsinni periarfissarpassuaqarpugut sammisat isumaqarluartut pingaartillugit ilaquttat ilagalugit aasarsiornissatsinnut, taamatullu aamma pitsaasunik aasaanerani sulinngiffeqarnermi sammissallugit pissarsiffiulluarsinnaasunik ileqqoqarluta.

 

Ataatsimiititaliap Innuttaasut Peqqissusiannik Ilisimatusarfiup nalunaarusiaa saqqummersinneqaqqammersoq “Kalaallit Nunaanni 15-iniit 34-inik ukiullit akornanni eqqarsartaatsikkut peqqissuseq aamma peqqissuseq” atuaqqammerpaa.

 

Tassani saqqummiunneqarput tunngavileeqataasut arlallit peqqissutsimut illersuutitut taaneqarsinnaasut, takkununngaga ilanngullugit; timi, tarneq anersaarlu, pinngortitaq, kalaalimerngit, najukkami naleqartitat nukittuffiillu minnerunngitsumillu utoqqaanerusunut atassuteqarluarneq.

 

Tamannalu aasarsiulernitsinnut immitsinnullu paarinissatsinnut qanilaartumik eqqaasitsinissamut naapertuulluinnarpoq.

 

Ataatsimiititaliap taamaattumik kikkulluunniit aasaaneranik atorluaanissamik, ataatsimoornermik pingaartitsinissaannik ilaqutariinnilu inuunerup pitsaasup paarilluarnissaanik kaammattorpai, matumuunalu kikkut tamaasa kaammattorlugit aasaanerata kikkunnut tamanut, meeqqanut, inuusuttunut utoqqaanerusunullu, toqqissisimanartuunissaanut imaqarluarnissaanullu akisussaaqataaqqullugit.

 

 

 

Paneeraq Olsen

Ilaqutariinnermut Peqqissutsimullu Ataatsimiititaliap siulittaasua

Paasissutissat sukumiinerusut ataatsimiititaliap siulittaasua +299 56 28 58 attaveqarfigalugu pissarsiarineqarsinnaapput