Nutaarsiassat


2018 2017 2016 Flere år...

11-09-2018

Nunat Avannarliit Siunnersuisoqatigiiffianni ataatsimiititaliat siullerpaamik Nuummi ataatsimiissapput

Nunat Avannarliit Siunnersuisoqatigiiffiat tamarmiusoq sapaatip akunnerani matumani ataatsimiititaliat Kalaallit Nunaanni ataatsimiisinniarlugit Nuummut tikissaaq.

 

Nunat Avannarliit Siunnersuisoqatigiiffiata 1952-imi pilersinneqarnerata kingorna Siunnersuisoqatigiiffik aatsaat tamarmiulluni Kalaallit Nunaanni katersuutissaaq. Inatsisartut Siulittaasoqarfiata aaqqissuussinermi qaaqqusisuusup nunanit avannarlernit nunanillu namminersorfiusunit tamanit inatsisartunut ilaasortanik Nuummi tikeraartitsinissani nuannaarutigaa. Tamanna Nunat Avannarliit Siunnersuisoqatigiiffiata nunat avannarliit pingaarnertut illoqarfiini tamani ataatsimiinnernik taakkuninnga ingerlatsinissamik siunertaqarneranik tunngaveqarpoq.

 

Ataatsimiinnerit pingasunngornermi sisamanngornermilu ulluni 12. aamma 13. september ingerlanneqassapput, tamatumani parteeqatigiikkaarluni ataatsimiittoqartassalluni, isumasioqatigiittoqartarluni ataatsimullu ataatsimiittoqartassalluni. Silaannaap allanngoriartornera Issittorlu qulequtaritinneqassapput, aammattaaq suliassaqarfiit Kalaallit Nunaannut tunngassuteqartut oqallisigineqassallutik.

 

Tamanna Nakuusa pillugu suleqatigiinneq, Meeqqat Pisinnaatitaaffiinik Illersuiniaqatigiiffik MIO, Ilinniartitsinermut Pilersaarut 2018 kiisalu NAPA-p meeqqanut inuusuttunullu suliniutai pillugit isumasioqatigiissitsinikkut pissaaq. Qulequttat allat tassaassapput Issittumi takornariaqarneq, attaveqatigiinneq kiisalu silaannaap allanngoriartornera.

 

Nunat Avannarliit Siunnersuisoqatigiiffiat naggasiutigalugu sisamanngornermi ulloq 13. september nal. 17.15 Naalakkersuisut tusagassiortunik katersuutsitsisarfianni tusagassiortunik katersortitsissaaq.

Nunat Avannarliit Siunnersuisoqatigiiffiata Nuummi ataatsimiinneri sisamanngornermi Katuami nereqatigiinnermik naammassineqassapput, tassani Inatsisartut Siulittaasoqarfiat qaaqqusisuussalluni.

 

Nunat Avannarliit Siunnersuisoqatigiiffiat pillugu paasissutissat uani nassaarineqarsinnaapput;

ina.gl/sinniisuutitaqarfiit


Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgimit, Danmarkimit, Sverigemit, Finlandimit, Islandimit nunanillu namminersorfiusunit Savalimmiunit, Kalaallit Nunaannit Ålandimillu inatsisartunut ilaasortanik 87-inik ilaasortalik.


Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnillu sinniisuutitaqarlutik. Laura Táunâjik (S) Nunat avannarliit piujuaannartitsinermut ataatsimiititaliaannut ilaasortaavoq, Sofia Geisler (IA) nunani avannarlerni ilisimasaqarnermut kulturimullu ataatsimiititaliamut ilaasortaalluni. Nikkulaat Jeremiassen (S) aamma Múte Bourup Egede (IA) sinniissuupput. Ilaasortat sinniisussallu Inatsisartunut ilaasortaassapput taakkunanngalu toqqagaassallutik.