Nutaarsiassat


2019 2018 2017 Flere år...

16-09-2011

Inatsisartut ataatsimiinnerinit isiginnaarutikkut aallakaatitsisarnissat

 

Inatsisartut ataatsimiinnerisa KNR-ip aallakaatitanik nassiussuissutai digitaliusut nutaat atorlugit ataavartumik aallakaatinneqartalernissaannik Ineqarnermut, Attaveqarnermut Angalannermullu Naalakkersuisoqarfiup neqeroorutaa Inatsisartut Siulittaasoqarfiannit ilassilluarneqarpoq.

 

Taamaalilluni 2011-mi ukiakkut ataatsimiisitsinerup saniatigut aamma siunissami Inatsisartuni oqallinnerit tamakkiisumik malinnaavigineqarsinnaasassapput. KNR-ip anguniarpaa ataatsimiinnerit kalaallisut qallunaatullu aallakaatinneqartarnissaat, isiginnaartut nammineq aalajangersinnaassallugu oqallinneq oqaatsit suut atorlugit malinnaaviginiarnerlugu.

 

Aallakaatitanik nassiussuissutit digitaliusut atorneqaleriartuaartinneqarnerat suli naammassineqanngimmat aallaakatitsinerit aatsaat 2012-imi nassiussuissutit digitaliusut atorneqaleriartuaarnerisa immikkooortuat kingulleq naammassippat nuna tamakkerlugu isiginnaarneqarsinnaalissapput.

 

KNR-ip aallakaatitanik nassiussuissutai digitaliusut atortugit TV-kkut aallakaatitsisarnissamik neqeroorut 2019-ip tungaanut atuuppoq. 2011-mi ukiakkut ataatsimiinnermi ataatsimiinnerit marlunngornerni sisamanngornernilu nal. 13 aallartittassapput pingasunngornerni nal. 11 aallartittarlutik. Ullunut ataatsimiiffiusussanut takussutissiaq uani takuneqarsinnaavoq: inatsisartutgl/ataatsimiinnerit.

 

 

Josef Motzfeldt

Inatsisartut Siulittaasuat

 

 

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.