Nutaarsiassat


2019 2018 2017 Flere år...

08-09-2011

Maniitsumi efterskolip kinguaattorneranut Aningaasaqarnermut Ataatsimiititaliaq pisuunngilaq

 

Pingasunngornermi ulloq 7. september 2011 Qanorooq Maniitsumi efterskole pillugu ilanngussaqarpoq. Ilanngussami atuarfik aatsaat aappaagu apriilip missaani naammassivissasoq oqaatigineqarpoq.

 

Ilanngussami oqaatigineqarpoq suliassap taamatut kinguaattornera naalakkersuinikkut akuersisartut pisuussutigigaat, atuarfiup allilerneqarnissaanut Aningaasaqarnermut Ataat-simiititaliaq aasanerani sulinngiffeqarnerup siuninngua aatsaat aningaasaliissuteqarmat.

 

Ulloq 22. juni 2011 nal. 9.15 ullaakkut Maniitsumi Efterskolip annertusineqarnissaanut aningaasaliissutinik qinnuteqaammik Aningaasaqarnermut Ataatsimiititaliaq tigusaqarpoq. Ataatsimiititaliaq ulloq taannarpiaq nal. 14 ileqquusumik ataatsimiippoq, qinnuteqaalli tuaviortutut nalunaarneqarsimanngimmat aningaasaliissuteqarnissamik suliassat eqqarsaatigalugit nalinginnaasumik sapaatip akunneranik ataatsimik siumut tunniussereersimanissamik nalinginnaasumik piumasaqaataasup sanioqqunneqarnissaa tunngavissaqartinneqarsimanngilaq. Tunniussereersimanissamut piumasaqaat taanna ukiorpassuarni atuutereersoq aalajangersarneqarsimavoq, ataatsimiititaliamut ilaasortat Naalakkersuisut qinnuteqaataasa amerlanertigut aningaasaqarniarnikkut annertuumik sunniuteqartussat sukumiisumik misissuisinnaanissaat taamatullu aamma suliarilluakkamik isumaliutigilluakkamillu tunngavilimmik aalajangiisinnaanissaat qularnaarniarlugu.

 

Ataatsimiititaliap tamatuma kingorna ulloq 30. juni ataatsimiinnermini qinnuteqaat oqaluuseraa, ullorlu taanna Naalakkersuisut qinnuteqaataanik ataatsimiititaliap akuersineranik nalunaarut ingerlatinneqarpoq.

 

Taamaalilluni ilumoorpoq Aningaasaqarnermut Ataatsimiititaliaq aatsaat suliassamut ani-ngaasaliissuteqarmat aasaanerani sulinngiffeqarneq aallartingajalivissoq, tamannali taamaallaat pissuteqarpoq, Ataatsimiititaliap aningaasaliissuteqarnissamik qinnuteqaatit suliarisinnaasanngimmagit, Naalakkersuisunit nassiunneqarsimatinnagit. Taamaalilluni suliassamik Aningaasaqarnermut Ataatsimiititaliap suliarinninnera Maniitsumi efterskolip allilerneqarnissaata kinguaattorfiuneranut sunnguamilluunniit pingaaruteqartutut isigineqarsinnaagunanngilaq.

 

 

Ataatsimiititaliaq sinnerlugu

 

 

Olga P. Berthelsen

Aningaasaqarnermut Ataatsimiititaliap siulittaasua