Nutaarsiassat


2019 2018 2017 Flere år...

05-07-2011

Holger Sivertsen, ukiuni ikaarsaarfiusuni ilusileeqataasoq

Kommunalbestyrelsimi  ukiut qulikkaat arlallit Ilulissat kommunerisimasaani ilaasortaasimasoq, siuarsaasutut borgmesteriusimasoq aamma 1983-imit 1991-imut qinigaaffinni pingasuni Inatsisartuni ilaasortaasimasoq tatigineqarluni sulilluarsimasoq Holger Sivertsen toqukkut qimaguttoq tusarlugu inuunerup naajassusaa uppernarseqqikkujarput.

 

Uuluku qinikkatut sulinermini isummaminik ersarissuliortartutut, allat isumaannik naalaallaqqissutut aamma ilisimasaminik atuilluartutut ilisarnaateqarpoq. Pingaartitaasali ilagaat qanorluunniit qinikkat akornanni isummat naapiffissasiornerat ilungersunartigisaraluarpat nuannaartitserusunneq saqqummiuttuartaramiuk.

 

Qinikkat akornanni partini assigiinngitsuneerneq aporfittut isumaqarfiginagu naammassisaqarusunnermini inuinnannguatut maniguussinnaanermik piginnaaniligaagatta Uulukup qaqutigoortumik piginnaaneqarfigaa.

 

Inoqamminut inoroorsaarumatussuseq pigisaa isummanik imaluunniit aqajaqqup imassaanik tunioraanermiippat pissusissamisuuginnartutut ilitsoqqussamisut ilisarnaatigilluagaasa ilagiinnarpaat.

 

Qitornaasa ilaqutaasullu annaasaminnik maqaasineranni Inatsisartut sinnerlugit misiginneqatiginninnera annertoqqutaalaarsinnaasutut tunniuppara.

Holger Sivertsen inuiaqatigiinni ukiuni ikaarsaarfiusuni ataqqinassusilimmik ilusileeqataasutut ataqqillugu eqqaamassavarput.

 

 

Josef Motzfeldt

Inatsisartut siulittaasuat