Ullormut oqaluuserisassat

Ullut ataatsimiiffiusut aqqaneq-sisamaat, sisamanngorneq 12. October 2017, nal. 11:00
Immikkoortup normua / Suliarineqarnissaata ullua
Siunnersuutit qulequtaat
Imm./pkt.: 2
Ullormut oqaluuserisassanut nassuiaat.
(Inatsisartut Siulittaasoqarfiat)

Imm./pkt.: 55
Siull. 17/5-2017
Siunissami aalisarsinnaanermut akuersissutip aqutsisoqarfimmi ataasiinnarmi atorneqartalernissaa - taamatullu aqutsisoqarfiup "Kalaallit Nunaata sinnerata" siunissami aqutsivinnut immikkoortunut arfinilinnut aggornilersorneqarnissaa (Maniitsoq, Paamiut, Qaanaaq, Sisimiut, Kalaallit Nunaata kujataa aamma Tasiilaq) anguniarlugu sinerissamut qanittumi qaleralinniarneq pillugu nalunaarut allanngorteqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Michael Rosing, Attaviitsoq)

Kommunit inatsimmi peqqussutaasut naapertorlugit pisortat ikiorsiissutinik tunniussinerminnut atatillugu qanoq annertutigisumik ikiorsiissutit aningaasanngornagit tunniussisarnersut misissoqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut. Misissuinermut atatillugu aamma innersuussutinik saqqummiusseqqunneqarput inatsisitigut qanoq pitsaanerpaamik kusanarnerpaamillu qularnaarneqarsinnaanersoq, atisassat aamma allat meeqqat pisariaqartitaat eqqarsaatigalugit angajoqqaat kiisalu allat meeqqanut angerlarsimasunut isumassuisut qulakkeerisalernissaat siunertaralugu.
(Inatsisartunut ilaasortaq Nivi Olsen, Demokraatit)

Inatsisartut aalajangigassaatut siunnersuutigineqarpoq Naalakkersuisut peqquneqassasut UPA2018-imut Tunumi aalisarneq pillugu nassuiaat agguaatissagaat. Nassuiaatip imarissavaa Naalakkersuisut aalisarnikkut inerisaaniarlutik iliuusissaat – kiisalu innersuussutit, aalisarnerup inerisarnissaanut tunngasutigut siunnersuutaasut.
(Inatsisartunut ilaasortaq Laura Táunâjik, Siumut)

Qarasaasiami nassatassamillu nunatsinni kinaassutsimut ilisarnaammik peqalernissamut atatillugu inatsisiliornerup piaartumik aallartinneqarnissaa pillugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Michael Rosing, Attaviitsoq)

Imm./pkt.: 113
Aappassaaneerinninnermi allannguutissatut siunnersuut Kultureqarnermut, Ilinniartitaanermut, Iliisimatusarnermut Ilageeqarnermullu Ataatsimiititaliamit saqqummiunneqartoq akuerineqarpoq.
Naalakkersuisut Atuarfik pillugu Inatsisartut inatsississaat nr. 15, 3. December 2012-imeersup kingornalu inatsimmut ilanngunneqarsimasinnaasunut atatillugu atuuttumut nalunaarummut Meeqqat atuarfianni immikkut ittumik atuartitsisarneq aammalu allamik immikkut perorsaanikkut ikiorsiisarneq pillugu Namminersornerullutik Oqartussat nalunaarutaat nr. 22, 23. juli 1998-imeersumut tulluussaaqqinneqarnissamik peqquneqarnissaannik Inatsisartut aalajangiiffissaattut siunnersuut.
(Inatsisartunut ilaasortaq Debora Kleist, Inuit Ataqatigiit)