Qinigaanerup Misilinneqarnisaanut Ataatsimiititaliaq
Qinigaanerup Misilinneqarnissaanut Ataatsimiititaliaagallartoq
Inatsisartut Suleriaasianni § 1, imm. 2 naapertorlugu nutaamik qinersisoqarneranut atatillugu qinigaanerup misilinneqarnissaanut ataatsimiititaliaagallartumik, sivisunerpaamik ilaasortaasimasunit angajullermik taassumalu toqqagaanik sisamanik allanik ilaasortalimmik pilersitsisoqassaaq.
Inatsisartut Suleriaasianni § 1, imm. 3 aamma § 6, imm. 2 naapertorlugit ataatsimiititaliaq Inatsisartunut Naalakkersuisunullu ilaasortat qinigaasinnaanerat pillugu inassuteqaateqassaaq.
Qinigaanerup Misilinneqarnissaanut Ataatsimiititaliaq
Qinigaanerup Misilinneqarnissaanut Ataatsimiititaliaq Inatsisartut inissitsiterlutik ataatsimiinneranni Inatsisartullu ukiuata aallartinnerani Suleriaatsimi § 7, imm. 1 naapertorlugu pilersinneqartarpoq.
Suleriaatsimi § 2 aamma 6, imm. 1-2 naapertorlugit pissutsit Inatsisartunut Naalakkersuisunullu ilaasortat ilaasortaanerannik naleqqukkunnaarutaasut pillugit ataatsimiititaliaq Inatsisartunut inassuteqaateqassaaq.
Inatsisartut Naalakkersuisullu pillugit Inatsisartut inatsisaanni § 25 malillugu Inatsisartut siulittaasuata, Naalakkersuisut siulittaasuata aammalu Naalakkersuisunut ilaasortat suliffeqarfinni, ingerlassani atorfeqarfinniluunniit pisortanit namminersortunilluunniit pigineqartuni toqqagaallutik suliaqartitaaffiinut tunngatillugit apeqqutit, pineqartut isumaginninnerminni tigummiinnarumallugit kissaatigisaat, ataatsimiititaliamut aalajangiiffigisassatut aamma saqqummiunneqartassapput.
