Nalunaaqutaq apeqqutaavoq …

Inatsisissatut siunnersuutit marluk Inatsisartunit ilaasortanit siunnersuutigineqartut Inatsisartut ataatsimiinnerminni suliaasa ilagaat. Inatsisissatut siunnersuutit marluullutik tamarmik nalunaaquttap aalajangersarneqartarneranut tunngapput: Nalunaaquttat ingerlaqatigiiffiat sorleq nunatsinni atuutissanersoq taamatullu aamma aasaanerani nalunaaqutaqartarnera atuukkunnaarsinneqassanersoq.

 

Siunnersuutit – inatsisissatut siunnersuutit allat assigalugit – Inatsisartut ataatsimiittarfianni pingasoriarlugit suliarineqaqqaartussaapput. Siullermeerinninneq siorna ukiakkut ataatsimiinnermi pivoq, tamatumalu kingorna siunnersuutit pineqartut marluk Inatsisartuni ataatsimiititaliamit suliarineqarsimallutik. Ataatsimiititaliaq apriilip naalernerani isumaliutissiissuteqarpoq. Ataatsimiititaliami amerlanerussuteqartut inatsisissatut siunnersuutit itigartinneqarnissaat inassutigaat, peqatigitilluguli aasaanerani nalunaaqutaqartarnerup atuukkunnaarsinneqarnissaanik Naalakkersuisunut kaammattuuteqarlutik.

 

Taamatut inassuteqarneq siunnersuuteqartut horaartuutiginngilaat, aappassaaneerinninnermilu siusinnerusukkut nalunaaquttat ingerlaqatigiiffiannut uteqqissinnaanissatta akuerineqarnissaa sukataarutigalugu, tamannalu illersorniarlugu assigiinngitsunik tunngavilersuuteqarlutik.

 

Tamanna tunngavigalugu Inatsisartunut ilaasortap siunnersuutigaa inatsisissatut siunnersuutit pineqartut ataatsimiititaliamut suliarineqaqqittussanngortinneqassasut. Tamanna akerlerineqanngilaq – isumaqartoqarsimassallunilu tamanna siunnersuuteqartut nuannaarutigisimassagaat.

 

Nuannaarnerli sivikitsuinnaavoq:

Maanna tassa ataatsimiititaliap suliassarilerpaa Inatsisartut aalajangiinissaminnut tunngavissaat itisilissallugit, ataatsimiititaliaq isumaqarpat tamanna ajornaranilu pisariaqarpoq. Tamannalu soorunami piffissamik tigusissaaq.

 

Aappassaaneerinninneq aatsaat nangeqqinneqarsinnaavoq ataatsimiititaliaq isumaliutissiissuteqaqqereerpat, tamatumalu ataatsimiinnermi ingerlasumi naammassineqarsinnaanissaa ataatsimiititaliap naatsorsuutiginagu.

 

Aappassaaneerinninnerup nangeqqinneqarnissaa pingajussaaneerneqarnissaalu taamaattumik ukiakkut ataatsimiinnermut kinguartinneqarput, tamannalu Inatsisartut ilasortat ilaannik pissutissaqalersitsisimavoq inuit attaveqaqatigiittarfiisigut kinguartitsinermut siulittaasoqarfiup isornartorsiorneqarnissaanut.

 

Inatsisissatut siunnersuutit pineqartut ataatsimiititaliamut utertinneqarnissaat Inatsisartut tamarmiusut aalajangerpaat, siulittaasoqarfiunngitsoq. Aappassaaneerinninnerlu aatsaat nangeqqinneqarsinnaavoq suliassaq suliakkiunneqartoq ataatsimiititaliap naammassereerpagu.

 

Piffissaq qanoq sivisutigisoq atussanerlugu ataatsimiititaliap nammineq naliligassaraa. Ataatsimiititaliallu tassa nalilersimavaa ataatsimiititaliap sulinissaanut piffissaq ataatsimiinnermi ingerlasumi sinneruttoq naammanngitsoq.

 

Inatsisissatut siunnersuutini marlunni apeqqutit pineqartut imaannaanngitsuupput. Apeqqutit minnerunngitsumik nunatsinni innuttaasunut pingaarutilerujussuupput. Siunnersuuteqartut namminneq tamanna uparuarsimavaat. Misissuinerit isumaliuteqarnerillu imaaliallaannaq nammassineqarsinnaaneq ajorput.

 

Siunnersuuteqartut namminneq isummerfigisassaraat aalajangiinissamut tunngavissat pigineqartut tunngavigalugit siunnersuutimik itigartinneqannginnerisa nuannaarutiginissaannut pissutissaqarnerunerlutik – imaluunniit siunnersuutip maanna aatsaat ukiakkut ataatsimiinnermi naammassillugit suliarineqarnissaannik ajuusaarutiginninnissamut pissutissaqarnerunerlutik.

 

Siulittaasoqarfiup appisaluunnissaanut pissutissaqanngilaq. 

 

 

Ikinngutinnersumik inuulluaqqusillunga

Kim Kielsen
Inatsisartut Siulittaasuat