Takusinnaavara Sermitsiaq.AG-p nittartagaani suliassat arlallit eqqarsaatigalugit Inatsisartut Siulittaasoqarfiat minnerunngitsumillu Inatsisartut Siulittaasuat oktobarip ulluisa qulingiluaanni, 24-anni 25-annilu arlaleriarluni ilisarisinnaanngisannik allaaserineqartarsimasoq.

Allaaserisat Inatsisartut sulinerannik nukittorsaataasutut Inatsisartunulluunniit ilaasortat isigineqarnerinik illersuisuusutut isiginngilakka.

Taamaattumik matumani erseqqissassavara Inatsisartut Siulittaasuattut “Pissuserissaannginnerup malitsigisaanik Inatsisartuni silaannaq nillertoq”-mik qulequtserlugu oktobarip ulluisa 25-ianni aviisip saqqummiussinera, tassani atuarneqarsinnaalluni uanga Inatsisartut Siulittaasuattut oqarsimanerarneqarlunga ilaasortap meeraa ”(ilaasortap) allaffianut tikilluaqqusaajunnaarsimasoq”, ilisarisinnaannginnakku.

Suliassamik aalajangersimasumik nipiliortoqartarneranik nalinginnaasumik naammagittaalliuutinut arlalinnut tunngasumik tamanna eqqortumik saqqummiinerunngilaq. Soorunami tamanna Inatsisartuni ataatsimoorluta ataatsimut aaqqiissuteqarfiginiagassaraarput, taamaattumillu akerliliiumaannartutut suliamik saqqummiineq ilisarisinnaanngilara. Pissutissaqarluarlunga taamatuttaaq suliassat ataasiakkaat oqaaseqarfigisinnaanngilakka.

Tamatumunnga taarsiullugu tusagassiorfinnut kaammattuutigerusuppara aviisip oktobarip ulluisa 25-anni partiit naammagittaalliuutaattut saqqummiunneqartut pillugit partiit naammagittaalliuuteqartut attaveqarfigissagai akissuteqartillugillu, siulittaasoqarfimmi taakku pillugit allat sinnerlugit isumaqarsinnaanngimmat.

Ikinngutinnersumik inuulluaqqusillunga

Mimi Karlsen