Nunanut Allanut Sillimaniarnermullu Ataatsimiititaliap piffissami 5. – 14. september 2023 USA-mut paasisassarsiorluni angalanini Mainemi Portlandimut Washington D.C.-mullu tikeraarnertalik qanittukkut naammassivaa.

Angalanermi tassani angusaqarluarnissaq siunertaralugu angalanissamut pilersaarut annertooq susassaqartunillu pingaarutilinnik ataatsimeeqateqarnernik oqalliseqateqarnernillu imaqartoq ataatsimiititaliap malissimavaa.

Naalagaaffeqatigiit ilaanni Mainemi illoqarfiit anginersaanni Portlandimi niuernikkut allatigullu soqutigisallit assigiinngitsut ataatsimeeqatigineqartarput. Portlandimi umiarsualivik Kalaallit Nunaanniit USA-mut isaaviuvoq pingaarutilik, taamaattumillu tassani oqaloqateqartarnerni minnerunngitsumik Kalaallit Nunaata USA-llu akornanni niueqatigiinnerulernissamut nioqqutissanillu assartuinissamut periarfissat kiisalu niueqatigiinnerulernissamut aporfiit sammineqartarsimallutik. Naalakkersuinermik sulialinnik ilaatigut USA-mi inatsisartunut allernut kongresimut ilaasortaq Chellie Pingree ataatsimeeqatigineqarpoq, tassani ataatsimiititaliamut ilaasortat periarfissaqarsimallutik ilaatigut niuernikkut ilinniartitaanikkullu ullumikkut suleqatigiinnerit siunissamilu suleqatigiinnissat pillugit isummaminnik assigiinngitsunik saqqummiussinissaminnut. Ataatsimiititaliaq taamatuttaaq periarfissaqarsimavoq USA-mi sakkutooqatigiit ilaasa Army National Guardip Mainemi qullersaqarfianut pulaarnissaminnut, tassanilu ilaatigut nassuiaanneqarlutik sakkutoqatigiit issittumut tunngatillugu immikkut ukkataqarnerat kiisalu Montenegromik suleqateqarnerat pillugu. Peqqinnissaqarfimmi sulisut pillugit suleqatigiinnissaq oqallisigissallugu ataatsimiititaliaq Portlandimi periarfissaqarsimavortaaq, tamatumunnga atatillugu ataatsimiititaliaq Naalakkersuisunut saaffiginnissuteqarsimalluni peqqinnissamut tunngasut ataatsimut ataatsimiititaliaq Joint Committee pillugu isumaqatigiissummut ilanngunneqarnissaat kaammattuutigalugu.

Washington D.C.-mi ilaatigut USAidimit, nunanut allanut naalakkersuisoqarfimmit State Departmentimit Pentagonimiillu atorfillit ataatsimeeqatigineqarput. Naalakkersuinermik suliallit eqqarsaatigalugit USA-mi inatsisartunut qullernut Senatimut ilaasortat Alaskamit Lisa Murkowski aamma Portlandimit Angus King ataatsimeeqatiginissaannut periarfissaqarsimavoq, taakkunanilu ilaatigut namminiilivinnissaq illersornissarlu kiisalu niuerneq peqqinnissarlu illugiilluni soqutigineqarlutik oqaloqatigiissutigineqarlutik.

Nunanut Allanut Sillimaniarnermullu Ataatsimiititaliap apeqqutit tamakku pillugit oqaloqateqartarnermi ingerlateqqinneqarnissaat qilanaaraa siunissamilu Kalaallit Nunaata USA-llu akornanni attaveqaatit nukittorsarneqarnissaat sulissutiginiarlugu.

Pele Broberg

Nunanut Allanut Sillimaniarnermullu Ataatsimiititaliap Siulittaasuugallartoq

Paasissutissat sukumiinerusut ataatsimiititaliap siulittaasuugallartup mobil +299 483536 attaveqarfigalugu pissarsiarineqarsinnaapput