Landskarsip 2005-imi Naatsorsuutai pillugit Kukkunersiuinermut Ataatsimiititaliap isumaliutissiissutaa innersuullugu Sermitsiap tallimanngornermi allaaserisaa saqqummiunneqarpoq.

Landskarsip 2005-imut Naatsorsuutai pillugit isumaliutissiissummut atatillugu ataatsimiititaliami suli suliaqartoqarmat ataatsimiititaliaq sinnerlugu nalunaarutigissavara. Isumaliutissiissutissaq suli naammassillugu suliarineqanngimmat tupinnanngitsumik suli atsiorneqaranilu pisortatigoortumik saqqummiunneqanngilaq.

Ataatsimiititaliami sulinermut atatillugu ataatsimiititaliami ilaasortat nipangersimasussaatitaapput, tassungalu atatillugu Inatsisartut suleriaasianni § 13-imi takuneqarsinnaasoq innersuussutigineqarpoq Ataatsimiititaliami oqaluuserineqartut tamanut tusarliunneqaqqusaanngillat.

Kukkunersiuinermut Ataatsimiititaliaq arfininngorpat ataatsimiissaaq, tassungalu atatillugu Landskarsip 2005-imut Naatsorsuutai pillugit isumaliutissiissutip inaarutaasumik suliarinera naammassineqarnissaa neriuutigineqarluni. Matuma kingorna kalaallisuuani danskisuuanilu imarisamigut aaqqiissutissat ataasiakkaat kiserngorutissapput, taamaalilluni sapaatip akunnerata tulliata aallartinnerani isumaliutissiissut atsiorneqarlunilu pisortatigoortumik saqqummiunneqarsinnaanngussaaq.

Inussiarnersumik inuulluaqqusillunga

Kristian Jeremiassen

Inatsisartut Kukkunersiuinermut Ataatsimiititaliaata siulittaasua