Inatsisartut ukiumoortumik nalunaarutaasa 20-issaat ukiumut naatsorsuuteqarfiusumut 2022-mut tunngasoq maanna qarasaasiakkut, ukiunut siuliinut Inatsisartut ukiumoortumik nalunaarutaat allat 19-it assigalugit, pissarsiarineqarsinnaanngorpoq. Tassani qaammatisiutit ukiuata ingerlanerani Inatsisartut sulinerat pillugu paasissutissat assigiinngitsorpassuit takuneqarsinnaapput. Inatsisartulli ukioq suliffigisaat, Inatsisartut ukiuat, septembarimit septembarimut ingerlasarpoq.

Ukiut tamaasa ukiumoortumik nalunaaruteqartarnissamik suliniuteqarneq inatsisartutigoortumik sulinerup inatsisiliortarnerullu ammasumik paasinartumillu saqqummiunneqartarnissaannik kissaateqarnermik tunngaveqarpoq.

2022-mut ukiumoortumik nalunaarut taamaalilluni taamatut ataavartumik ingerlataqarnermut ilaaginnarpoq.

2022-mut ukiumoortumik nalunaarut Inatsisartut nittartagaanni www.inatsisartut.gl-imi nassaarineqarsinnaavoq ugguunalu aaneqarsinnaalluni: https://ina.gl/gl/allagaatit/saqqummersitat/, kiisalu killilimmik amerlassusilerlugit naqiterneqarluni.

2022-mut ukiumoortumik nalunaarut Inatsisartut sulinerat eqqarsaatigalugu paasissutissanik atorluarneqarsinnaasunik assigiinngitsorpassuarnik imaqarpoq. Taamaalilluni siulittaasoqarfimmi, ataatsimiititaliani aallartitatullu suliat eqqarsaatigalugit paasissutissanik imaqarpoq. Aammattaaq ilaasortat sulinngiffeqarallarnerat sinniisussanillu atuineq aammalu Inatsisartunut ilaasortaatitat agguataarneqarnerat pillugit paasissutissanik imaqarpoq. Soorluttaaq Nersornaammik tunniussinerit Inatsisartunullu aningaasaliissutit qanoq atorneqartarneri pillugit paasissutissat atorluarneqarsinnaasut imarigai.

Neriuppunga ukiumoortumik nalunaarut Inatsisartut sulinerat pillugu paasissutissiilluassasoq aammalu Inatsisartut sulinerata ammasumik ingerlanneqarnissaanik anguniagaqartuarnermut tapertaassasoq.

Inussiarnersumik inuulluaqqusillunga

Mimi Karlsen
Inatsisartut Siulittaasuat