Inatsisartut Siulittaasuat ulloq 20. november Arktisk Kommandomi Generalmajorimik Søren Andersenimik pulaarneqarpoq.

Naalakkersuinikkut sulinermi pissutsit assigiinngitsut aammalu Arktisk Kommandop atuuffii pillugit Inatsisartut Siulittaasuat Generalmajorilu imminnut ilisimateqatigiipput.

Inatsisartut Siulittaasuat Mimi Karlsen ima oqaaseqarpoq:

”Arktisk Kommandomut attaveqaleqqinneq minnerunngitsumillu Generalmajorertaamut, inuiaqatigiit sinnerlugit suliniuterpassuit pitsaasut Arktisk Kommandomit ingerlanneqartut pillugit paasissutissiisumut, attaveqalerneq assut nuannaarutigaara. Soorluttaaq Arktisk Kommandop ataani suliniutit pitsaasut assigiinngitsorpassuillu, tassungalu ilanngullugu issittumi tunngaviusumik ilinniartitaanermik suliniutip minnerunngitsumillu Kalaallit Nunaanni Nakkutilliisut aallarnisarneqartut, tusagaqarfigineri paasisaqarfiullunilu soqutiginarpoq.

Taamatuttaaq Qeqertarsuup Tunuani piffissami kingullermi annertuumik ujaasineq tamatta malinnaaffigisarput pillugu Arktisk Kommandomut qujassutitta ingerlateqqissinnaanera pingaaruteqarpoq. Taamaattumillu inuiaqatigiit kalaallit sinnerlugit Arktisk Kommandop inuiaqatigiinni upalungaarsimanermi pimoorussilluni ikiuuttuarnerata qujassuteqarfiginissaanut periarfissaq atorluarneqarpoq. Upalungaarsimaneq pingaarutilik politiit suleqatigilluarlugit ingerlanneqartoq.”