Inatsisartunut ilaasortaasimasoq ilinniartitsisoq Astrid Fleischer Rex aggustip ulluisa 24-anni 2023 Danmarkimi Sæbymi najugaqarluni toqukkut qimaguppoq.

Astrid Fleischer Rex 1954-imi juulip ulluisa arfineq-aappaanni Uummannami inunngorpoq aamarsuarsiorfiusimasumilu Qullissani 1971-imi matuneqarnissaata tungaanut alliartorluni.

Astrid Fleischer Rex Vordingborgimit ilinniartitsisutut soraarummeersimavoq ukiorpassuarnilu meeqqat atuarfianni sulisimalluni. 2002-mi partii nutaamik pilersinneqartoq Demokraatit sinnerlugit Inatsisartunut qinigaaqqaarpoq.

Astrid Fleischer Rex taamaalilluni Namminersornerulluni Oqartussaanerup nalaani 2002-miit 2009 tikillugu Inatsisartunut ilaasortaavoq arnaq malunnaateqarluartoq. 2009-mi Namminersorluni Oqartussaanerup eqqunneqarnerata kingorna qinigaaqqippoq 2013-illu tungaanut Inatsisartunut ilaasortaalluni. Astrid Fleischer Rexip qinigaaffiinut tamanut atuuppoq ilungersuutigisartagai annerusumik tassaasimammata inuiaqatigiinni inuuniarnermikkut ajornartorsioqqajaasut atugarisaasa pitsanngorsarneqarnissaat minnerunngitsumillu ilaqutariinni nalinginnaasumik sunnernerlugaasarnikkut ajornartorsiutit.

Astrid Fleischer Rex taamaalilluni naalakkersuinermik suliaqarnermini ilungersuussaminik pingaarutilinnik angusaqarpoq, suliassani pingaarteqisamini eqqaamaneqaatigisassaminilu. Ataatsimut naalakkersuinikkut suliniarnitsinnut oqaluttuarisaanitsinnullu tunniussai nuannersumik qujaniarlutalu eqqaasassavagut.

Qimatai eqqarsaatitsinniipput. Astrid Fleischer Rexip eqqaaneqarnera ataqqinartuuli.

Kim Kielsen

Inatsisartut Siulittaasuat