Ullormut oqaluuserisassat

Ullormut oqaluuserisassanut nassuiaat

Uunga siunnersuut: Inissianik attartortitsisarneq pillugu Inatsisartut peqqussutaata allanngortinneqarnera pillugu Inatsisartut inatsisaat nr. xx, xx. xx 2017-imeersoq.
(Sulisunut inissiamik tigusinissamut ukiunik 7-inik maleruagassaqarnermut allanngortitsineq)

Siunnersuut: Inatsisartut Ombudsmandiat pillugu Inatsisartut inatsisaat nr. xx,xx.xx.2017-imeersoq.

2016-imut Ilassutissatut aningaasaliissutinut Inatsisissatut Siunnersuut.

Uunga siunnersuut: Akileraaruserinermik ingerlatsineq pillugu Inatsisartut inatsisaata nr. 11, 2. november 2006-imeersup allanngortinneqarneranik Inatsisartut inatsisaat nr. xx, xx. xxx 2017-imeersoq. (Akileraaruseriffiup aamma Naalakkersuisut oqartussaaffiinik agguataarineq il.il.)

Nunat Avannarliit Killiit Siunnersuisoqatigiiffiata Savalimmiuni, Islandimi Kalaallit Nunaannilu naalakkersuisunut kaammattuutigaa inuusuttunut 14-iniit 17-inut ukiulinnut Kalaallit Nunaanni, Savalimmiuni Islandimilu nunat avannarliit killiit efterskoliinik pissusissamisoornerpaamik qanoq pilersitsisoqarsinnaanera allaaseralugu nassuiaasioqqullugit 2018-imi Nunat Avannarliit Killiit Siunnersuisoqatigiiffiannut saqqummiunneqartussamik.

Paasissutissanik piniarnermut atatillugu inatsisitigut tunngavissaqarnissaq qularnaarumallugu, takuuk ilanngussaq 1 formatimi nassuiarneqareersumi, kingusinnerpaamik UPA2018-mi siunnersuummik saqqummiusseqqullugit, Naalakkersuisut peqquneqarnissaannik Inatsisartut aalajangiiffigisassaattut siunnersuut. Ilanngussaq 1-mi taaneqartut paasissutissat eqqarsaatigalugit Naalakkersuisut peqquneqarput tamanit iserfigineqarsinnaasumik nittartagalioqqullugit paasiuminartunik naatsorsoqqissaakkanik katersanik imalimmik, tassani soqutinittut meeqqat atuarfiat pillugu paasissutissanik naapertuuttunik aallarsinnaalersillugit. Naatsorsoqqissaakkanik katersivik suliarineqassaaq meeqqat atuarfii ataasiakkaat naleqqiunneqarsinnaanngorlugit, imatulli sanallugu inunnut ataasiakkaanut paasissutissat pissarsiariniarneqarsinnaajunnaarlugit.

Silaannakkut angallannermi kimmut aqqutimik ammaasoqarsinnaaneranik periarfissaq pillugu misissueqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut, misissuinerup inernera kingusinnerpaamik UPA2018-imi saqqummiunneqassaaq.

Inatsisartut aalajangiiffigisassaattut siunnersuutigineqarpoq, Naalakkersuisut ukioq 2017 naatinnagu kaajallaasitamik nutaamik atulersitsissasut pisortat pisiortortarnerat pillugu, tassanilu aamma kiffartuussinerit ilanngullugit naleqqussarneqarnissaa, siunertaralugu neqerooruteqartitsisarnermut inatsisissamut tunngavissiinissaq eqqarsaatigalugu, soorlu tamanna Inatsisartut UPA2015/118-imi akuersaarneqarneratigut pisussanngortinneqartoq.