Kalaallit Inatsisartui aamma inuiaat kalaallit inuiappassuit allat assigalugit Václav Havelip toqukkut qimagunnera nanertisimassutigaat.

Ukiuni nalorninartorsiorfiusuni, nunani killerni Europap qeqqani kangisinnerusortaanilu kommunismip ingerlatsineranut tapersersuinerup qularninngoriartornerani, Václav Havel qinikkat akornanni ullorissatut 'ullup malittaatut'qaammaaritsigaluni takkuppoq.

Siunnerfini qularinagit tunngavilersornerminilu ersarissuliullaqqilluni ingerlaaseq assortorpaa. Politikeritut eqqumiitsuliortutullu piginnaasaasa ingerlaasitoqqamik illersuigaluartunut allaat ataqqineqalersippaa, pissutsinullu atuuttunut akuersaaratik assortuigaluartuni taqisimaneq ersissuteqarani akersuunninngortippaa, ilumoortoq, kiffaanngissuseq oqartussaaqataanerlu pillugit.

Václav Havelip inuinnaassuseq atorlugu oqartussaaqataaneq ataatsimoornerlu illersussallugit periutsit suut sakkussaralugit ilisimalluagaasa ilagaat. Qularinngisaannarpaa qinikkat kisimik allannguiniarneq naammassisinnaanngikkat, inuiaat peqatissarigamigit ilisimaaraa, nunap immikkoortuini innuttaasut sinniisai peqatigalugit. Akerliulluni takutitsinertigut, saqqummersitsinertigut, nipilersornertigut taamaaqataasigullu qulakkeerumavaa kikkut tamarmik peqataasinnaanerat. Taama periuseqarnermigut Havelip kikkut tamarmik peqataaffigisinnaasamissut iliuusaat qinikkat pisortatigoortumik isumaqatigiinniarnerinut nallersuuttunngortippai.

Taamanikkut Tjekkoslovakiap demokrati, kulturikkut assigiinngitsorpassuartigut piginnaassutsi, inuiaallu tjekkit namminiussutsimikkut nakuussutaat nassaareqqinniarlugit ilungersoruttornerani Havelip immikkut inuiaassuseq makitaniutissatut isumaqarfiginngisaannarpaa. Tassalu tjekkit nunaminni ilungersuuteqaraluartut inuiannik allanik peqateqartariaqarnerat aamma annertoqqusersugassaqarnerat  piaartumik suliniumminut ilannguppai. Inuiappassuaqarmat silarsuup qaamaneranut periarfissarpassuinullu atuutsinneqarunnarsimasunut puttallaqqinniartunik.

Václav Havelip peruttulernermini ilungersornermini peqatigisimasaasa ilaannik 2010-mi Pragimi pisortatigut tikeraartinneqarninni naapitsisinnaasimanera qujaniutigalugu kalaallit Inatsisartuisa  tjekkiamiunut Inatsisartuinullu misigeqatiginninnerat matumuuna nalunaarutigaara.

Josef Motzfeldt,
Inatsisartut Siulittaasuat
Igaliko 18. december 2011