Ammasumik siunersiuinissamut aggeqqusissut

28.02.2024

Naalagaaffinngornissamut Nunanullu allanut Naalakkersuisoq Inatsisinut Ataatsimiititaliap marlunngornermi ulloq 12. marts, nal. 14-15, siunersiunissamut aggersarpaa.

Kalaallit Nunaanni inatsimmut tunngaviusussamut missingiut maanna piareerneqartoq siunersiuinermi sammineqassaaq.

Siunersiuinermi matuma kinguliani allassimasut oqaluuserineqarnissaat Inatsisinut Ataatsimiititaliamit kissaatigineqarpoq:

1. 1. Inatsimmut tunngaviusussamut missingiut pillugu (UKA2023/49 aamma UKA2023/74) aalajangiiffigisassatut siunnersuutit siullermeerneqarnerannut Naalaakkersuisut akissuteqaamminni naliliipput ’maannali Kalaallit Nunaata namminersortup Inatsit Tunngaviusussaatut missiliummik patajaatsumik, sulili naammassineqanngitsumik peqalerpugut’.
      Immikkoortut sorliit Naalakkersuisunit naammassineqanngitsutut immikkut isumaqarfigineqarnersut Naalakkersuisumit itisilerlugit nassuiarneqassasut ataatsimiititaliamit kissaatigineqarpoq.
      
      
   2. Naalakkersuisut taamatuttaaq allapput ’Inatsit Tunngaviusussaq pillugu Isumalioqatigiissitap isumaliutissiissutaata paasiuminartunngorlugu allanneqarnera Naalakkersuisut aallartereerpaat’.
      Suliap tamatuma erseqqinnerusumik nassuiaatigineqarnissaa suliallu killiffiata paasissutissiissutigineqarnissaa ataatsimiititaliamit kissaatigineqarput.
      
      
   3. Naalakkersuisut aamma allapput, ’innuttaasut akuutinneqarnissaat aalajangeeqataanissaallu pingaaruteqarpoq’.
      Taamatut peqataatitsinissamik suliniut qanoq ingerlanneqassanersoq pillugu Naalakkersuisut pilersaarutaat itisilerlugit nassuiaatigineqassasut ataatsimiititaliamit kissaatigineqarpoq.
      
      
   4. Ataatsimiititaliap paasivaa ’Inatsit Tunngaviusussaq pillugu Isumalioqatigiissitap innuttaasunik naapitsillutik, nunarput tamaat angallavigalugu siunneersuummik saqqummiussinissaat’ Naalakkersuisunit kissaatigineqartorujussuusoq.
      Soorlu ataatsimiititaliaq isumaliutissiissummini allattoq Inatsit tunngaviusussaq pillugu isumalioqatigiissitami ilaasortat innuttaasunik oqallitsitsinermik ingerlatsissappata tamanna ataatsimiititaliamit eqqarsarnartoqartinneqarpoq isumalioqatigiissitat atorunnaarsinneqareermata. Taamaattumik oqallitsitsilluni ataatsimiisitsinernut Naalakkersuisut pilersaarutaat kikkullu taakkuninnga ingerlatsisuussanersut ataatsimiititaliap paaserusuppaa.
      
      
      
   5. Innuttaasunik peqataatitsinissamik suliaqarnissamut innuttaasullu peqatigalugit oqallinnissamut piffissaliussamik paasitinneqarnissani ataatsimiititaliap kissaatigaa.
      
      
      
   6. Siunissami suliassat eqqarsaatigalugit aningaasaqarnikkut sinaakkutissat qanoq ittut Naalakkersuisunit missingersuusiorneqarpat?

Siunersiuineq Inatsisartut ataatsimiittarfianni Erling Høeghimi ingerlanneqassaaq tusarnaarianullu ammalluni. Tusarnaariat 15-it tikillugit siunersiunermi peqataanissaannut periarfissaqarpoq. Tamatuma saniatigut tusagassiortunut inissat tallimat inniminnerneqarput. Inissat siulliuniunneq malillugu tunniunneqassapput inatsisartut@inatsisartut.gl-imut saaffiginnilluni imaluunniit 34 50 00-imut sianerluni Inatsisartut Allattoqarfiannut attaveqarnikkut.

Siunersiuinermi tusarnaarniaraanni inissamik siumoortumik inniminniisoqartariaqarpoq. Tusarnaariat Inatsisartunut saaffiginnittarfimmut saaffiginnissapput kingusinnerpaamik siunersiuinissap aallartinnissaa 15 minutsit sioqqullugu.

Siunersiuineq kalaallisut qallunaatullu malinnaavigineqarsinnaassaaq.

Anders Olsen

Inussiarnersumik inuulluaqqusillunga

Annertunerusumik paasisaqarusukkaanni ataatsimiititaliap siulittaasua attavigineqarsinnaavoq uunga sianernikkut mobil +299 49 07 08