Aassuutit taarnerpaaffialu – Inatsisartut Siulittaasuannit ullukinnermi pilluaqqussut

Oqaluttuarineqartarpoq itsarsuarooq siulivut isumaqarsimasut kaperlalerluni seqineq tarrikkami nuissaarluni kiviartuinnaleraluarsimasoq. Kiviinnaraluarpanngooq aasassaarluni ukiuujuaannalissagaluaq qaammassaarluni – Aassuuteqanngitsuuppat, tassa ulloriannguit marluk Altair aamma Tarazed ullukinnerup nalaani kangiagut ullaakkut nuisartut.

Taakkugooq ulloriannguit Aassuutit seqineq kiviartortoq ataaniit ungoorsimavaat qummut aallartillugu. Tassagooq ukiut tamaasa seqerngup ammukarnerani Aassuutit sillimasarput, seqerngup killissani tikikkaangagu ungoortarlugu, qummullu aallaraangat Aassuutit inunnut takutittarput inuit nuannaaqqullugit, qaammariartulissaqimmat.

Ullumikkut decembarip ulluisa 21-eraat, taamalu aamma Ullukinnerulluni – ulloq siulittaa nalliussisarsimasaat uagutsinnullu tamanut suli imikkut pingaarutilik.

Ulloq manna ukiup ulluini qaamanikinnersaavoq taarneralu sivisunersaalluni. Taarnerali ulloq manna nalliussinngilarput. Qaammariartulernera nalliussivarput. Upernariartulerluni aasariartulernera, kuunnguit kuuppalaaqqilernissaat ullullu pinngortitap tunniussinnaasaanik pissarsiffiulluartussat takkuteqqinnissaat nalliussivarput.

Ullukinneq taamaallunittaaq ukiup qanoq ilinerata allanngorartuarneranut pinngortitallu ingerlaasianut ersiutaaginnarani, neriunnermik isumalluarnermillu inunnut tunniussisarpoq; Taarsiorfiit qaamanermik taarserneqarumaartut taarmiuuginnarsinnaanngitsugullu.

Tamannalu tassa Aassuutit qaammalinnginnerani uatsinnut saqqummernerminni oqariartuutaat.

Ullukinnersiornitsinni nunatsinni innuttaasut tamaasa pilluaqquakka; neriuppunga amerlasuut ulloq malunnartikkumaaraat ileqqutoqqavullu atatillugit, ullorlu nuannaarnermik, neriunnermik isumalluarnermillu tamatsinnut tunniussiumaartoq.

Mimi Karlsen
Inatsisartut Siulittaasuat