2024-mi upernaakkut ataatsimiinneq

 

2024-mi Inatsisartut upernaakkut ataatsimiinnissaannut (UPA24) oqaluuserisassat ullumi nassiussuunneqarput.

 

Inatsisartut upernaakkut ataatsimiinnerat tallimanngornermi ulloq 5. april 2024 nal. 11.00 aallartissaaq ullullu 28. maj 2024 tungaanut ingerlasussatut pilersaarutigineqarluni.

 

Siulittaasoqarfiulli ullut ataatsimiiffiusussat kingullit ulloq 22. marts 2024 apeqquteqaat aallaavigalugu oqallinnissamik siunnersuutinik tunniussivissap kingorna naleqqussarsinnaavai, taamaattumillu ullut ataatsimiiffiusussat ilaat kingusinnerusukkut iluarsineqarsinnaassallutik.

 

Taamaalilluni Inatsisartunut ilaasortanit immikkoortut nutaat katillugit 30-t Naalakkersuisunillu immikkoortut nutaat 17-it UPA24-mi suliarineqartussatut oqaluuserisassanut ilanngunneqarput. Tamatuma saniatigut immikkoortut sisamat UKA24-mit kinguartinneqarsimasut oqaluuserisassanut ilanngunneqarput.

 

Sapaatit akunnerini ullut ataatsimiiffiusartussat imatut agguataarneqarput:

 

2024-mi upernaakkut ataatsimiinneq (UPA24)

 

· 2024-mi upernaakkut ataatsimiinneq tallimanngornermi ulloq 5. april nal. 11.00 aallartissaaq

· Sapaatip akunneranut ullut pingasut Inatsisartuni ataatsimiittarfianni ataatsimiiffiusassapput – marlunngorneq, pingasunngorneq sisamanngornerlu – piffissami nal. 11.00 – 17.00

· Ataasinngornerit tallimanngornerillu ataatsimiititaliani ataatsimiiffiusassapput

· Pingasunngornerni tallimani piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni. Akunneq apeqquteqarfiusinnaasoq siulleq ulloq 10. april pissaaq (Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq pisariaqarneralu malillugu nutarterneqartassalluni)

· Partiit siuttuisa akunnerminni apeqqarissaarnerat ulloq 17. april nal. 9.30-miit 11.00-imut ingerlanneqassaaq, tamatumalu kingorna ataatsimiinneq akunnermik apeqquteqarfiusinnaasumik nanginneqassalluni, taannalu naammasseriarpat 17.00-ip tungaanut oqaluuserisassani immikkoortut nangillugit oqaluuserineqassallutik.

· Ulluni 20-ni ataatsimiiffiulluni UPA24-mi ulloq ataatsimiiffiusoq kingulliugallartoq tassaassaaq ulloq 28. maj.

 

UPA2024-mut tunngatillugu atortussat tamarmik www.ina.gl-imi takuneqarsinnaapput, soorlu aamma oqaluuserisassat allannguutaat nittartakkakkut pisartagarineqalersinnaasut.

 

Ilaasortat Naalakkersuisullu ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarput, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput.

 

 

 

Inussiarnersumik inuulluaqqusillunga

 

 

Mimi Karlsen