Qaqortumi mittarfiliorsinnaaneq pillugu suliaq maanna ingerlasoq Aningaasaqarnermut Ataatsimiititaliap kingullermik ataatsimiikkami oqaluuseraa.

 

Suliaq taanna Aningaasaqarnermut Ataatsimiititaliamit inaarutaasumik isummerfigineqan­ngilaq. Ataatsimiititaliamilu amerlanerussuteqartunit Inuit Ataqatigiinniit, Siumumit Atassum­millu erseqqissarumaneqarpoq mittarfiliornissanut 2013-imi aningaasanut inatsimmi ukiuni­luunniit missingersuusiorfinni aningaasanik immikkoortitsisoqarsimanngimmat.

 

Timmisartoqarfinnik sanaartorneq pillugu Inatsisartut inatsisaat atuuttoq 2008-meersoq (timmisartoqarfiit pillugit Inatsisartut inatsisaat nr. 12, 5. december 2008-meersoq) ataatsimiititaliami amerlanerussuteqartunit Inuit Ataqatigiinniit, Siumumit Atassummillu innersuussutigineqassaaq. Ilaatigut inatsimmi § 3, imm. 1, nr. 2-mi allassimavoq; timmisarto­qarfiup ingerlanneqarnerani aningaasartuutit aalajangersimasut aningaasartaannut sinne­qartoorfiusumik matussuserneqarsinnaassapput. Ingerlatsinerup isertitaqartarnerullu pitsan­ngorsarneqarnissaa eqqarsaatigalugu naapertuuttumik ingerlatsisoqassaaq.

 

Aammalu inatsisip § 7-iani allassimavoq; nutaamik sanaartornerup imaluunniit timmisarto­qarfinnik pioreersunik nutarterinerup, allanngortiterinerup imaluunniit iluarsaassinerup nu­nap sinnerani attaveqaqatigiinnermut kingunerisassai pillugit nassuiaasiortoqartassasoq. Sanaartornermik suliassat angallannerup ataatsimoortumik aaqqissuussaanerani ilaajuar­tussanngorlugit tunngaviliijuartussanngorlugillu aallartinneqassapput ilusilersorneqassallu­tillu, pingaartumik nuttarsinnaaneq kiisalu silap pissusaani silallu nikerarnerani pissutsit eqqarsaatigineqassallutik. Kiisalu sanaartukkat annertunerusut avatangiisinut sunniutigisin­naasaat pillugit naliliisoqartassaaq.

 

Siuliani allassimasut naapertorlugit ataatsimiititaliami amerlanerussuteqartunit siuliani taa­neqartunit pingaartinneqarpoq Qaqortumi mittarfiliorsinnaanermik aalajangiinissami piareer­saataasumik suliat sukumiisut aammalu inuiaqatigiit aningaasaqarnerannik misissueqqissaarneq aallaaviusariaqartut. Taamaalillunilu najukkami, nunap immikkoortuani aammalu nuna tamakkerlugu inuiaqatigiit aningaasaqarnerannut aammalu angallannermut tunngasu­mik sunniutissat Qaqortumi mittarfiliornissamik pilersaarutini ilanngullugit nalilerneqarnis­saat pingaaruteqarpoq.

 

Kommunit aningaasaqarnerata aammalu takornariaqarnermik inuussutissarsiutip misissui­nerni taakkunani ilaatinneqarnissaat iluaqutissarsiffiussaaq.

 

Paasissutissat kingulliit naapertorlugit ataatsimiititaliami amerlanerussuteqartut Inuit Ataqa­tigiit, Siumup Atassutillu paasivaat aalajangiinissamut tunngavissaq tamakkiisoq suli pigine­qanngitsoq, tamatumanilu amerlanerussuteqartunit tunngavissaatinneqarpoq suliassaqarfik pillugu misissueqqinnissamik Assartuinermut Isumalioqatigiissitap kaammattuutaa maanna Naalakkersuisunit malitseqartinneqartoq. Kiisalu isiginiagassat akiitsut aamma aningaasalii­sarnerit pillugit Naalakkersuisut periusissiaanni nassuiaatigineqartut ilanngunneqartaria­qarput.

 

Paasinninneq naapertorlugu misissuinerit taakku inerneri pigineqaleriarpata Inatsisartut, tassungalu ilanngullugu ilaatigut Aningaasaqarnermut Ataatsimiititaliaq, Naalakkersuisunit ilisimatinneqassapput. Taamatut ilisimatitsinerup ilaatut pilersaarutit piviusunngortinneqar­nissaannut Naalakkersuisut naatsorsuutigisaat pissusissamisoortumik nassuiaatigineqar­sinnaapput.

 

Tamatuma saniatigut suliassamik ingerlatsinermi innuttaasut sapinngisamik annertunerpaa­mik akuutinneqarnissaat ataatsimiititaliami amerlanerussuteqartunit siuliani taaneqartunit pingaartinneqarpoq. Suliaq una pillugu misigissutsit sakkortummata aammalu najugaq pillugu ilisimasat annertummata erseqqippoq, Naalakkersuisulli ilisimasat paasisimasallu taakku pisariaqarneratut annertussusilimmik akuutikkumaaraat ataatsimiititaliap tatigaa.

 

Olga P. Berthelsen

Aningaasaqarnermut Akileraartarnermullu Ataatsimiititaliamut siulittaasup tullia

 

 

Paasissutissat annertunerusut ataatsimiititaliap siulittaasuata tullianut Olga P. Berthelsenimut Uldumimut mobil +299 55 33 68-imut attaveqarnikkut pissarsiarineqarsinnaapput.