Inatsisartut Nunanut Allanut Sillimaniarnermullu
Ataatsimiititaliaata tusagassiorfitsigut nalunaarutaa

Nunanut Allanut Sillimaniarnermullu Ataatsimiititaliaq København-imi

Inatsisartut Nunanut Allanut Sillimaniarnermullu Ataatsimiititaliaata Folketingip Udenrigspolitiske Nævn-ia pingasunngornermi ulloq 8. december Christiansborg-imi ataatsimeeqatigaa.

Maannakkorpiaq nunanut allanut sillimaniarnermullu tunngassuteqartut apeqqutit ataatsimoorullugit soqutigineqartut arlaqartut ullormut oqaluuserisassaasimapput. Namminersorneq pillugu Isumalioqatigiissitat sulinerat, tassani nunanut allanut sillimaniarnermullu tunngasut immikkoortutut ilaatigut qitiummata illuatungeriit ilaatigut oqallisigaat. Nammisorneq pillugu Isumalioqatigiissitami sulinerup killiffia pillugu illuatungeriit ilisimatinneqarput. Namminersorneq pillugu Isumalioqatigiissitat sulineranni, pisinnaatitsissummik inatsit qanittukkut akuersissutigineqartoq, akornutaassannginneranik Kalaallit Nunaata oqaaseqaataa ataatsimiititaliamit erseqqissaatigineqarpoq.

Kalaallit nerisassiaannik EU-mut eqqussinermut atatillugu malittarisassat ilaatigut pillugit Nævn-i ataatsimiititaliarlu oqaloqatigiipput. Sillimaniarnikkut apeqqutit arlaqartut ataatsimiinnermi eqqartorneqarput, matumani ilanngullugu Kalaallit Nunaata sillimaniarnera, Thulemi sakkutooqarfik, missil-inut illersuut Kalaallillu Nunaata nunarsuarmi inissisimanera, aammali amerikarmiut sakkutooqarfiisa eqqaanni avatangiisinik saliinissaq eqqartorneqarpoq.

Nunat tamalaat akornanni Kalaallit Nunaata attaveqaatai kiisalu Naalagaaffiit Peqatigiit nunap inuiinut Ataavartumik Ataatsimiititaliaa pillugit (Permanente Forum), maannakkut Kalaallit Nunaata sinniisuutitaqarfigiligaa, ataatsimiititaliap Nævni ilisimatippaa.

Nævn-ip ataatsimiititaliallu akornanni ataatsimiinnerit paaseqatigiiffiusut malunnarpoq, Nævn-imit ataatsimiititaliamiillu suliat malinnaaffigineqartut pillugit paasissutisseeqatigiittarneq illuatungeriinnit naammagisimaarneqarpoq. Taamaattumik siunissami Nævn-i ataatsimiititaliarlu ukiup affakkaartumik ataatsimiittassasut aalajangiunneqarpoq, taamaaliornikkut nunanut allanut sillimaniarnermullu sulianut tunngasut piffissami aalajangersimasumi sammineqartut pillugit qanilaarnerusumik attaveqaqatigiittarnissaq kiisalu ajortumeerneqatsaaliuutaasussanik peqataasinnaanissaq qulakkeerneqarsinnaaqqullugit. Piffissami aggersumi pingaartumik Namminersorneq pillugu Isumalioqatigiissitat sulinerat ataatsimiinnerni taakkunani oqallisigineqartassaaq.

Paasissutissat sukumiinerusut pissarsiarineqarsinnaapput – ataatsimiititaliap siulittaasuanut Per Rosing-Petersenimut, oqarasuaat +299 55 24 75-imut saaffiginninnikkut.

Inussiarnersumik inuulluaqqusillunga

Per Rosing-Petersen
Ataatsimiititaliami siulittaasoq
Ulloq 9. december 2004, København

Inatsisartut Nunanut Allanut Sillimaniarnermullu Ataatsimiititaliaanni makku ilaasortaapput:
Inatsisartunut ilaasortaq Per Rosing-Petersen (Siumut), siulittaasoq
Inatsisartunut ilaasortaq Aqqaluk Lynge (Inuit Ataqatigiit), siulittaasup tullia
Inatsisartunut ilaasortaq Jonathan Motzfeldt (Siumut)
Inatsisartunut ilaasortaq Ellen Christoffersen (Atassut)
Inatsisartunut ilaasortaq Per Berthelsen (Demokraatit)
Folketingimut ilaasortaq Kuupik Kleist, taaseqataasinnaanngitsoq
Folketingimut ilaasortaq Lars Emit Johansen, taaseqataasinnaanngitsoq