Kalaallit Nunaanni Sakkutooqarfiup Grønlands Kommandop suliassat Kalaallit Nunaannut attuumassutillit tamaasa isumagisarai, tamakkulu pillugit ataatsimiititaliaq sukumiisumik ilisimatitsivigineqarpoq.

Sakkutooqarfiup taassumalu ataaniittut suliassaat pingaarnerit, taakkununnga ilaallutik qimusserluni nakkutilliineq, Sirius , Station Nord aammalu Pituffimmi danskit sakkutuuisa naalagaat pillugit ataatsimiititaliaq nassuiaanneqarpoq.

Ujaasisarnermut annaassiniartarnermullu, nakkutilliinermut oqartussaassusermik nittarsaassineq, aalisarnermik nakkutilliineq kiisalu avatangiisinut mingutsitsinermillu nakkutilliinneq ataatsimiititaliap ilaatigut paasisaqarfigai. Kalaallit Nunaannut Kalaallit Nunaanni Sakkutooqarfik annertuumik pingaarutilimmik suliaqartoq ataatsimiititaliaq isumaqarpoq.

Minnerunngitsumik inuiaqatigiinni innuttanut Sakkutooqarfik immikkut pingaarutilimmik ikiuunnermik suliaqartuuvoq. Taamaammat Kangilinnguanut Kangilinnguaniillu qulimiguulimmik timmisartuussisarnermut ajornartorsiut aaqqinniarneqarmat ataatsimiititaliap nuannaarutigaa.

Ataatsimiititaliaq soqutiginartumik Ivittuunukarpoq, tassani ilaatigut silaannaap mi-ngutsinneqarneranut, CO2-mut, uuttortaaveqarlunilu Ivittuut Aatsitassarsiorfianut Aatsitassarsiornermullu Katersugaasiveqarluni. Katersugaasiviup aatsitassarpassuit asserpassuillu saqqummersitarai, taakkulu piffissap ingerlanerani Kalaallit Nunaanni aatsitassarsiornerup pingaarutilimmik oqaluttuassartaanik imaqarlutik.

Avatangiisit piuinnarnissaat illersorneqarnissaallu, inuussutissarsiutitigut suliniutit pillugit kommunip suliniutai, kommunerujussuanngornissallu sunniutissai borgmesterip borgmesterillu tulliata ilisimatitsissutigaat, kommunillu Kangilinnguanut attuumassuteqarnera suleqateqarneralu pillugit ataatsimiititaliaq ilisimatitsivigineqarluni.

Angalaqatigiit siuttuat Josef Motzfeldt ataatsimiititaliaq sinnerlugu oqaaseqarpoq a-ngalaneq pissarsiaqarfiulluartoq, sammisani pingaarutilinni arlalinni ineriartornermut malitseqartitsinissamut ilaasortat tunngavissinneqartut. Josef Motzfeldtip ilisimatitsissutigaa peqataasut angalareerlutik isumaqartut Kalaallit Nunaata Sakkutooqarfia maannamutut Kangilinnguani inissisimanermigut inuiaqatigiinnut kalaallinut iluaqutaasoq. Ilanngullugu Josef Motzfeldtip erseqqissarpaa Ivittuuni kommunalbestyrelsimik ataatsimeeqateqarneq pingaartuusoq.

Taamaalilluni angalaneq ataatsimiititaliap suleqqinnissaanut pitsaasumik tunngavissiisuuvoq.

Paasisaqarnerujumasut angalanermi siuttoq

Josef Motzfeldtimut,

oqarasuaat: +299 55 76 41-mut saaffiginnissinnaapput