Nersornaat

15.09.2023

Inatsisartut Siulittaasuata Kim Kielsenip ulloq 15. september 2023 Sisimiuni nalliuttorsiorpalaartumik katerisimaarnermi Hanseeraq Enoksen kuultiusumik nersornaaserpaa.

 

Inatsisartut Siulittaasuata Hanseeraq Enoksenimut oqaaseqarnermini ilaatigut erseqqissarpai:

 

"Nuannaarutigeqaara illit qaaqqusatillu kuultiusumik Nersornaaserneqarnissannut maanga nalliuttorsiorpaluttumik katerisimaarnermut tikilluaqqusinnaagassi. Hanseeraq Enoksen, taamatut nersorniarneqarputit ukiorpassuarni angusaqarluarlutillu kilisaataatileqatigiiffimmik - suliffeqarfimmik annertuumik peqatigitillugulu ilaqutariippassuarnut, najukkami innuttaasunut minnerunngitsumillu Qeqqata Kommunianut isertitaqartarnikkut tunngaviulersimasumik pingaarutilimmik - ingerlatsisimanerit pissutigalugu.

 

Inatsisartut Siulittaasoqarfiata kuultiusumik Nersornaaserniarlutit immikkorluinnaq ittumik aalajangersimavaa, tassami nunatsinni unamminartoqarpat tamanna innuttaasut namminneq sanarfisassarimmassuk. Tamanna illit nammineq takutissimavat iluatsilluartumik sulilu siuariartortumik nunatsinnilu isertitaqartarnermut suli ajunngitsumik tunniussaqartartumik suliffeqarfiuteqarnerit pissutigalugu. Inuussutissarsiutit suliffeqarfillu taama annertutigisoq iluatsissappat tamanna naleqqussarsinnaassutsimik ulluinnarnilu akisussaassuseqartumik aqutsinissamik piumasaqaatitaqarpoq. Ingerlatatit kommunimut pingaarutilerujussuupput qularnanngitsumillu aamma ajornartorsiutinik naapitaqartarsimassuutit pisortat pilersuinermut attaveqaasersuinermullu atortunut allanut naleqqussarnissaq eqqarsaatigalugu. Suliffeqarfik ilissi suliffeqarfissitut annertutigisoq najukkami innuttaasunut peqqinnarpoq, suliffeqarfissinnilli ingerlatsisinnaanissinnut piumasaqaatit naammassiniarlugit tamanna aamma soorunami kommunimut piumasaqaatitaqarlunilu kommunimit paasineqartariaqartunik. Maluginiagassaavortaaq ilaqutariittut suliffeqarfiutersi inuussutissarsiutip iluani suliffeqarfinnit allanit pisiarineqarsimanngimmat, soorlu aamma aqqutinni ajornartorsiutinik naapitaqartarsimagaluarlutit qasusuillutit kommunimi suliffeqarfinnik ingerlatsinerit ingerlatiinnarsimagit.

 

2017-imi sølviusumik Nersornaaserneqarputit ukiorpassuarni kilisaatini naalagaasarsimanerit piffissamilu sivisuumi tunniusimallutit aalisarneq eqqarsaatigalugu nersortarialimmik suliaqarsimanerit aammalu aalisarnermik inuussutissarsiuteqarnermi inuusuttunut amerlasuunut maligassiuisuunerit pissutigalugit. Inuusuttortavut inuussutissarsiutini assigiinngitsuni maligassiuisussanik pisariaqartitsipput, tamatumanilu aalisarnermik inuussutissarsiuteqarneq nunatsinni inuussutissarsiutit pingaarnersaraat, tassanilu inuusuttortavut inuussutissarsiuteqartissagutsigit maligassiuisussanik pisariaqartitsilluta. Aalisarnermik inuussutissarsiuteqarneq nunatta aningaasaqarniarneranut isertitaqarfiusartutut pingaarutilerujussuartut Siulittaasoqarfiup isigaa."

 

 

Siulittaasoqarfik sinnerlugu

Kim Kielsen

Inatsisartut siulittaasuat