Inatsisartut Kukkunersiuinermut Ataatsimiititaliaa ulloq 19. maj 2004-mi Aalisarnermut Piniarnermullu Pisortaqarfiup ingerlatsinikkut kukkunersiorneqarnissaa siunnerfigalugu kukkunersiuisarfik Deloitte-mut misissueqqaarnissamik suliakkiissuteqarpoq apeqqutillu makku qulaajaavigineqarnissaat siunertarineqarpoq:

• Pisortaqarfimmi sulisunik atortunillu aqutsineq
• Pisortaqarfimmi sulinerup aaqqissuussinikkut siulersuinikkullu iluarsartuunneqarnera
• Pisortaqarfimmi sulianik ingerlatsinikkut aqqutit misissoqqissaarneqarneri matumani ilanngullugit ESU-mut tunngasut
• Pisortaqarfimmi sulianik suliarinnittarnerup pitsaassusaa
• Pisortaqarfimmi aaqqissuussaanikkut anguniakkatut siunniussat eqquutsinneqartarneri naapertuutsinneqartarnerilu
• ESU-mut tunngasut misissuataarneqarnerat

Kukkunersiuinermut Ataatsimiititaliap ulloq 1. august 2004 misissueqqaarnerup inernera kukkunersiuisarfimmit Deloitte-mit tiguvaa. Misissueqqaarneq tunngavigalugu Pisortaqarfiup ingerlatsinikkut kukkunersiorneqavinnissaa Ataatsimiititaliap ingerlanneqassanngikkallartoq Ataatsimiititaliap aalajangiuppaa.

Kukkunersiuinermut Ataatsimiititaliap misissueqqaarnerup inernera Aalisanermut Piniarnermullu Naalakkersuisumut nassiuppaa, misissueqqaarnerullu inernera pillugu Naalakkersuisup oqaaseqaateqarnissaa Kukkunersiuinermit Ataatsimiititaliamit kissaatigineqarpoq. Ataatsimiititaliap aammattaaq misissueqqaarnerup assilinera Naalakkersuisunut tamanut paasissutissatut nassiuppaa.

Aalisarnermut Piniarnermullu Naalakkersuisup oqaaseqaatai Ataatsimiititaliamit tiguneqarniariarpata 2003-mut landskarsip naatsorsuutai pillugit Ataatsimiititaliap isumaliuutissiissutimini Aalisarnermut Piniarnermullu Pisortaqarfik pillugu oqaaseqaatissani saqqummiunniarpai.  

Annertunerusumik paasisaqarusukkuit uunga saaffiginnissinnaavutit: Isak Davidsen, Kukkunersiuinermut Ataatsimiititaliap siulittaasua, oqarasuaat angallattagaq 52 02 11.