Kalaallit Nunaanni Pigisanik aalaakkaasunik arsaarinnissuteqartarneq pillugu ataatsimiititaliaq
Inooqatigiit ataatsimut iluaqutissaat siunertaralugu pigisaareersunik naalagaaffiup imminut pigisassanngortitsisarnera pillugu Kalaallit Nunaannut inatsit nr. 182, 26. maj 1972-imeersoq naapertorlugu Kalaallit Nunaanni Pigisanik aalaakkaasunik arsaarinnissuteqartarneq pillugu ataatsimiititaliaq Kalaallit Nunaannut ministerimit pilersinneqarpoq.
Inooqatigiit ataatsimut iluaqutissaat siunertaralugu Kalaallit Nunaannut ministerip (Angallannermut ministerip) suliassanngortissinnaavaa imaluunniit akuersissutigalugu suliaqarfinni Kalaallit Nunaanni pigisaareersut, Namminersornerullutik Oqartussat tigusimanngisaanni, imminut pigisassanngortinneqassasut.
Kalaallit Nunaanni pigisassanngortitsinermi kommissioni tallimanik ilaasortaqarpoq. Siulittaasuussaaq naalagaaffimmi kommissariet ilaat. Kalaallit Nunaannut ministerip (Angallannermut ministeri) ilaasortaasussat marluk ukiuni arfinilinni atasartussat toqqassavai, taakkunannga pinngitsoorani ataaseq Kalaallit Nunaanni illuliortarnermik imaluunniit illuliortarnermut tunngasunik paasisimasaqartussaasoq.
Pigisassanngortitsinermi kommissioni immikkut paasisimasaqartunik aggeqqusaqarsinnaavoq.
Pigisanik aalaakkaasunik arsaarinnissuteqartarneq pillugu Inatsisartut inatsisaata nr. 25, 30. oktober 1992-imeersup akuersissutigineqarnerata kingorna, suliaqarfinni Namminersornerullutik Oqartussanut atasuni pigisanik aalaakkaasunik inunnit pigineqartunik arsaarinnittoqarsinnaaneranut atuuttup, inooqatigiit ataatsimut iluaqutissaat siunertaralugu pigisaareersunik naalagaaffiup imminut pigisassanngortitsisarnera pillugu inatsit 1972-imeersoq suliatigut pingaarutikinnerulersimavoq. Pissutsip tamatuma aalajangersimasup kinguneraa, Angallannermut ministeri toqqaasinnaanerminik aatsaat ingerlatsisinnaasoq, taama iliornissamut aalajangersimasumik aatsaat peqqutissaqartoqartitsippat.
Taamaakkaluartoq qinersereernerit tamaasa inissitsiterluni ataatsimiinnermi Kalaallit Nunaanni pigisanik aalaakkaasunik arsaarinnissuteqartarneq pillugu ataatsimiititaliamut Inatsisartut ilaasortanik marlunnik sinniisussanillu marlunnik toqqaaneq ingerlattarpaat. Tamanna pigisanik aalaakkaasunik arsaarinnittarneq pillugu ataatsimiititaliap suliamik aalajangersimasumik suliaqartitaaleriataarnissaanut naapitseriarneruvoq.
Toqqaanerup atuuffia:
Piffissaq Inatsisartunit toqqagaaffik Inatsisartut qinigaaffiat malitaraa. Qinersisoqareernerata kingorna Inatsisartut inissitsiterlutik ataatsimiinneri tamaasa ilaasortanik marlunnik sinniisussanillu marlunnik Inatsisartut toqqaasarput.
Saaffigisassaq:
Ekspropriationskommissionen for Vestgrønland ved Kommissarius for statens ekspropriationer i Jylland, Lyseng Allè 1, 8270 Højbjerg, og Transport- og Bygningsministeriet Oqarasuaat.: +45 86 52 16 55 kiisalu Inatsisartut Allattoqarfiat.