Ullormut oqaluuserisassat

Ullormut oqaluuserisassanut nassuiaat.

Sulinermik inuussutissarsiuteqartut sulinerup nalaani ullormut minuttini 30-ni timigissarsinnaatitaalissappata tamatuma namminersorlutik inuussutissarsiuteqartunut pisortanullu aningaasatigut allaffissornikkullu kingunerisassaanik misissuinermik aallartitsinissamut Naalakkersuisut peqquneqarnissaannik Inatsisartut aalajangiiffigisassaattut siunnersuut. Misissuinermi taamatuttaaq tamatuma innuttaasut peqqissusiannut kingunerisassai taamatullu aamma inooriaatsimik pissuteqartumik nappaatit appariarnissaasa naatsorsuutigineqartup malitsigisaanik napparsimalluni sulinngitsoortarnerit Peqqinnissaqarfimmullu aningaasartuutit ikinnerulernerisa inuiaqatigiit aningaasaqarniarnerannut sunniutissai qulaajarneqassapput. Misissuineq UKA 2025 nallertinnagu Inatsisartunut agguaanneqassaaq.

Piffissaq sapaatip akunneranut nalinginnaasumik suliffiusartoq ullumikkut nalunaaquttap akunneri 40-sunit 35-inut appartinneqarpata, tamatuma aningaasatigut, inuiaqatigiinnut peqqissutsikkullu kingunerisassaanik misissueqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut. Misissuineq UPA 2025 nallertinnagu Inatsisartunut agguaanneqassaaq.

UKA2025 sioqqullugu utoqqalinersiaqarneq pillugu inatsisip allanngortinneqarnissaa siunertaralugu Inatsisartut Inatsisissaattut siunnersuummik Naalakkersuisut saqqummiusseqqullugit peqquneqarnissaannik Inatsisartut aalajangiiffigisassaattut siunnersuut, taamaalilluni utoqqalinersiat tunngaviusumik soraarnerussutisianut soraarnerussutisianullu tapinut agguarneqarnerat atorunnaarsinneqassalluni, aamma taamaalilluni utoqqalinersiallit namminneq inooqatigisalluunniit isertitai apeqqutaatinnagit ukiumut 165.000 kr.-inik soraarnerussutisiaqalernissamut pisinnaatitaaffeqalissallutik. Utoqqalinerisiat maannakkumut periuseq atorlugu ukiumut ataasiarlutik Kalaallit Nunaanni Naatsorsueqqissaartarfiup procentimik aaqqiissutaasumik naatsorsugaa toqqammavigalugu nalimmassaaserneqartassapput.

Namminersornerullutik Oqartussani, Kommuninilu nunatsinni tjenestemandit pillugit Inatsisartut Inatsisaata § 55-ip imm.1-ip allanngortinneqarnissaanut tunngasumik nalunaarusioqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut, taamaaliornikkut nunatsinni tjenestemandit, danskit naalagaaffiata nunatsinni tjenestemandinut malittarisassai malillugit tjenestemandisut soraarnerussutisiaqalersinnaaleqqullugit, taamaattorli tapeqartitsisoqassalluni soraarnerussutisiaqaataasussanit aningaasarsianinngaaniit %-mik aaliangersimasumik angissusilikkamik, taamaaliornikkut nunatsinni, qallunaat nunaannilu tjenenestemandit soraarnerussutisiaqarnikkut assigiinngissutaasup nalimmassarneqarnissaa anguniarneqassalluni. Naligiinngissutaasoq nalimmassarniarlugu, tapeqaataasussap qanoq annertutiginissaa aammalu kommuninut, namminersorlutillu oqartussanut qanoq aningaasatigut naleqassanersoq nalunaarusiami UKA25 sioqqullugu tunniunneqartussami ersarissarneqassaaq. Tamatumuungattaaq ilanngullugu nunatsinni qassit, tjenestemandinut isumaqatigiissut naapertorlugu atorfinitsinneqarsimanersut nalunaarusiami ersarissarneqassaaq.

Pisortat pigisaannik filmiliortitseqatigiiffimmik atortorissaarutinillu pisariaqartinneqartunik pilersitsisinnissamik Naalakkersuisut suliaqaqqullugit peqquneqarnissaannik Inatsisartut aalajangiiffigisassaattut siunnersuut.

Sullissinerit suut sumiiffinnilu suni neqeroorutigineqarnersut innuttaasunit qaqugukkulluunniit nalorngissutigineqaqqunagit peqqinnissaqarfiup sullissinerinut takussutissiap tamatigut nutarterneqartuarsimanissaa ullutsinnullu naleqqussarneqartuarsimanissaa qularnaarniarlugu Naalakkersuisut peqquneqarnissaannik Inatsisartut aalajangiiffigisassaattut siunnersuut.

Peqqinnissaqarfik Region Nord patienthoteleqalernissaa pillugu Naalakkersuisut UPA2025-mut agguaassassamik nalunaarusioqqullugit peqquneqarnissat pillugu Inatsisartut aalajangiiffigisassaattut siunnersuut.

Namminersorlutik Oqartussat, Kommunillu sanaartugassanut aningaasartuutissaanninngaaniit ukiumut 1 %-mik, pisortat sanaartugassaataannut immikkut toqqakanut kusassaanermut aningaasaliissuteqartalernissaq, kusassaanermilu eqqumiitsuliortunik suleqateqartalernissaq pillugu Naalakkersuisut inatsimmik suliaqaqqullugit peqquneqarnissaannik Inatsisartut aalajangiiffigisassaattut siunnersuut. Sanaartugassani kusassaanermi sanaartukkap silataata, iluatungaatalu kusassarneqartarnissaat matumani pineqarpoq.

Inissiani pisortaqarfiusuni Namminersorlutik Oqartussat Kommuunillu sumiiffimmi kalaallit eqqumiitsuliaannik kusassarneqartartussaatilerlugit pisussaaffeqalernissaat pillugu Naalakkersuisut eqqumiitsuliornermik ingerlatsineq pillugu Inatsisartut inatsisaata allanngorteqqullugu peqquneqarnissaannik Inatsisartut aalajangiiffigisassaattut siunnersuut.