Ulloq 26. maj Landsrådit siulittaasuata innuttaasunit qinikkap siulliup Erling Høeghip qinerneqarneraniit ukiut 50-inngornerat nalliussisinnaavarput
Tallimanngornermi maajip ulluisa 26-ianni immikkorluinnaq ittumik nalliussissaagut, nunatta naalakkersuinikkut oqaluttuarisaaneranut annertuumik pingaaruteqarsimasumik. Ullormi taanna ukiut 50-it qaangiutissapput Landsrådit siullerpaamik namminneq akunnerminnit inuit qinigaannik siulittaasussaminnik qinersinerannit.
Taamaalilluni Landsrådinut ilaasortat namminneq aalajangertalerpaat kina siulittaasorissanerlugu. Tamatuma tungaanut siulittaasussaq Danmarkimit toqqarneqartarsimavoq, Ilaasortat arlallit piffissap ingerlanerani nutaamik aaqqissuussinerup eqqunneqarnissaanik sorsuuteqarsimapput, maajillu ulluisa 26-anni 1967 Erling Høegh tassa qinerneqarluni, ukiunilu sisamani siulittaasuulluni.
Pisimasoq pingaarutilik taanna Inatsisartut malunnartinniarpaat Katuap inersuaaraani nalliuttorsiualaartitsillutik. Aaqqissuussineq tallimanngornermi ulloq 26. maj nal. 14.00-imiit 16.30-mut ingerlanneqassaaq tamanullu ammalluni. Najugassaqassaaq, oqalugiartoqartarluni nipilersortoqartassallunilu. Tamatuma saniatigut Inatsisartut Siulittaasoqarfiata Landsrådimut siusinnerusukkut ilaasortaasarsimasut qaaqqusimavai.
Lars-Emil Johansen
Inatsisartut Siulittaasuat