Sisimanngornermi angalaneq Kangerlussuarmut ingerlaqqissaaq, tassani Ataatsimiititaliap pineqaatissinneqarsimasunut isertitsiviugallartoq nutaaq takussallugu. Isertitsivik qaammatialuinnguit matuma siornagut atorneqalersoq taamaallaat piffissami sivikinnerusumi pineqaatissinneqarsimasunut atorneqartarpoq, aammalu pinerluuteqarsimasunik isumaginnittoqarfimmi utaqqisut allattorsimaffiata takisoorujussuup annikillisarneqarnissaa siunertaralugu pilersinneqarluni.

Kiisalu Inatsisinik Atortitsinermut Ataatsimiititaliap Kangerlussuarmi Naalakkersuisut pinerluttulerinermi inatsisilerinermik immikkut ilisimasalittaat, Leif Senholt, ataatsimeeqatigissavaa, taassuma Justitsministerip Kalaallit Nunaanni pinerluttulerineq pillugu inatsisissatut siunnersuutaa aammalu Kalaallit Nunaanni eqqartuussisarnermik inatsisissatut siunnersuutaa ataatsimiititaliamut ilisaritissallugu.

"Angalaneq manna tikillugu naatsorsuutigisanut naapertuuppoq", taamannak oqarpoq ataatsimiititaliap siulittaasua Kristian Jeremiassen. "Tikilluaqquneqarluarpugut, paasissutissallu pissarsiarisagut ataatsimiititaliap sulinerani atorsinnaallugit."

Kalaallit Nunaanni pinerluttulerineq pillugu inatsisissatut siunnersuutip aammalu Kalaallit Nunaanni eqqartuussisarnermik inatsisissatut siunnersuutip Inatsisartut ukiakkut ataatsimiinneranni oqaluuserineqarnissaat naatsorsuutigineqarpoq.

Paasissutissanut allanut atatillugu saaffigineqassaaq: Inatsisinik Atortitsinermut Ataatsimiititaliap Siulittaasua Kristian Jeremiassen (Tlf. 54 06 94)