Ukiakkut ataatsimiinneq 2024

 

Inatsisartut Siulittaasuannit Mimi Karlsenimit

 

Ulloq 20. september 2024 qinigaaffimmi ingerlasumi ukiakkut ataatsimiinnerit kingullersaannut Inatsisartut katersuutissapput. Ataatsimiinnissaq aggersoq sorpassuartigut pissanganartussaavoq. Siunnersuuterpassuit saqqummiunneqarsimasut ataatsimiinnermilu oqaluuserineqartussat kisiisa pissutiginagit. Kisiannili aamma ataatsimiinnermi tassanerpiaq ataatsimiittarnerup aaqqissuussaanera nutaaq misileqqaartussaassavarput. Aaqqissuussineq nutaaq inatsisartutigoortumik sulinermut tamatsinnik piffissaqarnerulersitsiniartussaq.

 

Ataatsimiittarnerup aaqqissuussaanera nutaaq maluginiarneqangaatsiarsimavoq – aamma tusagassiorfinni. Ukiakkut ataatsimiinnerup ukioq manna 2025-mi februaari ilanngullugu ingerlanissaa minnerunngitsumik maluginiarneqarsimavoq.

 

Ataatsimiittarnerilli aaqqissuussaasarnerat ukiorpassuarni, aap, 1979-imi namminersornerulerattali, ilisimaarisimasarput sulinitsinnilu tunngavigisimasarput sooq allanngortinneqassava?

 

Tamanna naatsumik akineqarsinnaavoq: Piffissaqarnerulerata ulapinnerulersimavugut. Siusinnerusukkut pissutsinut sanilliullugu siunnersuutit amerlanerujussuit amerlanertigullu imaannaannginnerujussuit Inatsisartut ullumikkut suliarisalersimavaat. Siunnersuutilli tamakku suliarinissaannut piffissaqarnerulersimanngilagut. Ataatsimiinnermiit ataatsimiinnermut nutaamut arlaatigut tamatta sukkanerusumik arpattaliinnarsimavugut. Tamannalu unammillernartoqarsimavoq qinikkanut sulisunullu, aamma ilaqutariittut inuuneqartariaqartunut.

 

Allattoqarfimmi sulisut eqqarsaatigalugit Sullivinnik Nakkutilliisoqarfiup 2024-mi juunimi eqqaasippaatigut ataatsimiinnermik aaqqissuussisinnaanngitsugut aatsaat ingerlanneqarsinnaasussamik sulisugut akunnerni amerlavallaani piffissaalatseqalutillu sulippata.

 

Tamanna siulittaasoqarfiup tusaanngitsuusaaginnarsimanngilaa. Inatsisartuni sulisut ukiut ingerlanerini tupinnaannartumik eqaatsumik naatsorsuutigisallu sipporlugit sulisarsimapput, ataatsimiinnerni ulapaarfioqisuni qinikkat suliassaminnik suliaqarsinnaaniassammata. Tamannalu pissutigalugu sulisut qujassutissaqarfigeqaagut – Sullivinnik Nakkutilliisoqarfiulli erseqqilluinnartumik oqariartuutigaa maannamutut ingerlaannarsinnaanngitsugut: Inatsisartut – sulisitsisut allat assigalugit – sullivinni atukkat pillugit inatsisiliornerit malittarisassallu sulisut peqqissusiannik atugarissaarnissaannillu illersuisussat malissallugit pisussaaffeqarput.

 

Ataatsimiittarnerit aaqqissuussaanerata nutaap aamma malitsigissavaa sapaatit akunnerisa ataatsimiiffiusussat ilaat Inatsisartut ataatsimiittarfianni ataatsimiinnernut immikkoortinneqassammata, sapaatit akunneri allat ataatsimiititaliani ataatsimiinnernut immikkoortinneqartut. Taamaliornikkut anguniarneqarpoq sapaatit akunnerisa naanerini unnukkullu ataatsimiititaliani ataatsimiittoqartannginnissaa. Inatsisartut ataatsimiittarfianni ataatsimiinnerit maanna sapinngisamik nal. 16-ip missaani naammassineqareersimasussanngorput. Allatut oqaatigalugu Inatsisartut ataatsimiinnerisa piffissat nalinginnaasumik suliffiusartut iluanni ingerlanneqartalernissaat anguniarneqarpoq.

 

Tamanna anguniarlugu ataatsimiinnissaq piffissamut sivisunerusumut siaarneqartariaqarsimavoq. Suliassat ikinnerulinngikkaluarput, suliarinissaannulli piffissaqarnerulissaagut.

 

Inatsisartut katersuussimasarnerisa ukiumut Inatsisartut suliffigisaannut tamarmut siammarneqarnerunissaannik Inatsisartunut ilaasortanit ikigisassaanngitsunit kissaatigineqartarsimasumut aamma tamanna naapertuuppoq. Aamma uagutsinnut qinikkanut katersuunnerit sivikitsut ulapaarfiusaqisullu inuttut aamma akeqarsimapput.

 

Allanngortitsineq eqqarsaatigalugu iluarisimaarinnittorpassuit siumut tusareerpagut. Piffissaqarnerunata ulapinnerulernerput arlaannaannulluunniit nutaarsiassaanngilaq – ataatsimiittarnerit illersorneqarsinnaasumik ingerlanneqarsinnaanermik killinganiittarsimapput.

 

Ileqqut nutaat inuit ilaannut paasiuminaassinnaasarput. Allanngortitsinerit suugaluartulluunniit aamma ikaarsaariarnermi ajornartorsiutinik iluarsiniarneqartariaqartunik malitseqarsinnaapput. Tamakku aamma inissaqartinneqartariaqarput. Ataatsimiinnerilli aaqqissuussaanerata nutaap ullut suliffiusut tamatsinnut pitsaanerulersissagai naatsorsuutigineqarpoq.