2024-mi ukiakkut ataatsimiinneq

 

2024-mi Inatsisartut ukiakkut ataatsimiinnissaannut (UKA24-mut) oqaluuserisassat ullumi nassiussuunneqarput.

 

Aallarniutigalugu oqaatigineqassaaq ukiakkut ataatsimiinneq piffissanut marlunnut UKA24 imm. I-imut aammalu UKA24 imm. II-mut avinneqarmat.

 

Inatsisartut ukiakkut ataatsimiinnera tallimanngornermi ulloq 20. september 2024, nal. 11.00 aallartissaaq pilersaarutigineqarporlu ulloq 27. november 2024-p tungaanut ingerlanneqarnissaa, tamatuma kingorna UKA24-mi imm.1 unikkallassaaq, tamatumalu kingorna UKA24 immikkoortoq 2 ulloq 27. januar 2025 aallartissalluni, tamatumani ataatsimiititaliat sapaatip akunnerani ataatsimi ataatsimiiffeqassallutik inersuarmilu ataatsimiinneq siulleq ulloq 4. februar 2025-mi ingerlanneqassalluni.

 

Ilaatigut inersuarmi sapaatip akunnerinik ataatsimiiffeqarluni ilaatigullu ataatsimiititaliat sapaatip akunnerinik ataatsimiiffissalerlugit  Inatsisartut ataatsimiinnerat aaqqissuunneqarpoq.

 

Apeqquteqaatilli aallaavigalugit oqallisissianik tunniussivissap 6. september 2024-p kingorna ullut ataatsimiiffissat  siulittaasoqarfimmit naleqqussarneqartussaassapput, taamaattumillu tamatuma kingorna ullut ataatsimiiffiit ilaanni oqaluuserisassanik naleqqussaasoqartariaqartassaaq.

 

Taamaalilluni Inatsisartunut ilaasortanit immikkoortut nutaat katillugit 51-it aammalu Naalakkersuisunit immikkoortut nutaat 29-t UKA24-mi oqaluuserisassatut ilanngunneqarput.

 

Sapaatit akunnerini ullut ataatsimiiffiusartussat imatut agguataarneqarput:

 

2024-mi ukiakkut ataatsimiinnerup immikkoortua I aammalu 2024-mi ukiakkut ataatsimiinnerup immikkoortua II (UKA24-p immikkoortua I aammalu UKA24-p immikkoortua II)

 

 

UKA24-p immikkoortuani I-imi aamma immikkoortuani II-mi oqaluuserisassanut missingiummi ilanngunneqartumi ullut ataatsimiiffiusut katillugit 30-ussapput UKA23-mi ullut ataatsimiiffiusut 25-iusimasut, ullullu ataatsimiiffiusussat sapaatip akunnerini 38, 39, 40, 42, 43, 46 aamma 47-mi ullunut ataatsimiiffiusussanut pingasunut sisamanulluunniit agguataarneqassallutik aammalu sapaatip akunneri 41, 44, 45 aamma 48 ataatsimiititaliat ataatsimiiffigissallugit, tulliuttullu immikkut malugeqquneqarlutik:

 

·     Ullut ataatsimiiffiusut nal. 11.00-imiit 16.00-imut ingerlasassapput ullup qeqqanut unillatsiartoqartarnani

·     Pingasunngornikkut akunneq apeqquteqarfiusinnaasoq pingasunngornikkut nal. 10.00-imiit 11.00-imut ingerlasassaaq, tamatumalu kingorna ataatsimiinneq nal. 16.00-ip tungaanut ingerlaqqittarluni

·     Piffissami 11.00-imiit 16.00-imut sapaatip akunneranut ullut ataatsimiiffiusussat pingasunit sisamanut amerlassuseqassapput

·     Oqaluuserisassat ingerlaartut – tamatuma kingunerisaanik ullormi ataatsimiiffimmi immikkoortut naammassillugit suliarineqanngitsoortut ullormut ataatsimiiffimmut tullermut imaluunniit ullormut immikkut ittumik ataatsimiiffimmut ingerlaqqittassapput. 

 

 

UKA2024-mut tunngatillugu atortussat tamarmik www.inatsisartut.gl-imi takuneqarsinnaapput, soorlu aamma oqaluuserisassani allannguutit oqaluuserisassanut nassuiaammi takuneqarsinnaasassasut.

 

Ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarpoq, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput.

 

Inussiarnersumik inuulluaqqusillunga

 

Mimi Karlsen