Tusagassiorfinnut nalunaarut

Nunatsinni nunaqarfinni isorliunerusunilu pitsaanerusumik assigiinngitsutigut atugaqalernissaq anguniarlugu, Norgep avannarpasissuani periuutsit paasisassarsiorfigalugit angalaneq pissarsiaqarfiulluarpoq

Aningaasaqarnermut Akileraartarnermullu Ataatsimiititaliami amerlanerussuteqartut Norgemut paasisassarsiorlutik angalapput.

Nunaqarfinni isorliunerusunilu inuuniarnikkut atukkatigut pitsanngorsaanissap anguniarneqarnissaanut periarfissat aammalu Norgep avannaani (Finnmark) aaqqissuussisimanerup isumassarsiorfigineqarsinnaanera Inatsisartut 2022-mi upernaakkut oqaluuseraat. Tamatumunnga aammalu Naalakkersuisut nassuiaataannut ”Norgep avannarpasissuani najugaqariaatsit inuussutissarsiutillu pigiinnarnissaannut aningaasaqarnerup tungaatigut kajumissutsit” 2023-meersumut malitseqartitsissutitut Aningaasaqarnermut Akileraartarnermullu Ataatsimiititaliami amerlanerussuteqartut Norgemut paasisassarsiorlutik angalaqqammerput. Piffissamut ungasinnerusumut isigaluni inuiaqatigiit aningaasaqarnerannut tunngasumik aningaasaliissuteqarnissamut aningaasaateqarfiit  aammalu Norgemi qitiusumik allaffeqarfiup isorliunerusullu akornanni suleqatigiinnerup annertunerusumik paasisaqarfiginissaat siunertaavoq.

Tromsimi Finnmarkimilu naalagaaffiup sinniisua (statsforvalteren), Finnmarkimi nunap immikkoortuanut borgmesteri (fylkeordføreren) aammalu Vadsøp Kommuniani borgmesteri (ordføreren) ataatsimiititaliamit ataatsimeeqatigineqarput. Ataatsimiititaliamit tusagaqarfigineqarput unammilligassat najugaqariaatsimut attaveqatigiinnermullu tunngasut kiisalu assersuutigalugu nukissiutinik attaveqaasersuutinillu ineriartortitsinerit aammalu inuussutissarsiutinut namminersortut aningaasaliinissaannut kajumilersitsinikkut illoqarfinnut annernut nuttarnerit annikillisarnissaannut suliniuteqarneq pillugu naalakkersuinikkut pingaarnersiuinerit. Najukkami inuussutissarsiornermik ineriartortitsineq aammalu takornariartitsinermik piujuartitsinermik aallaaveqartumik ingerlatsisoqarnissaanik kiisalu piffissaatillugu malittarisassiortarnissamik nunap immikkoortuani kissaateqarnerup ataatsimiititaliamit paasisimasaqarfiginerulernissaa Vadsømi Inuussutissarsiortut Peqatigiiffiata annertunerulersippaa. Illuutinut, piniarnermut, aalisarnermut kiisalu inuussutissarsiornermut tunngatillugu Finnmarkimi nunap immikkoortuinik nunaminertanik ataatsimoortumik pigineqartunik aqutsineq qitiutillugu Finnmarksejendommen Finnmárkkuopmodat (FeFo) angalanermi aamma ataatsimeeqatigineqarpoq.

Ataatsimiititaliap Tromsømi Tromsøp borgmesteria (ordføreren) pulaarpaa, taassumalu issittumi illoqarfittut pingaarnertut illoqarfiup ineriartornera aammalu takornariaqarnermik siuarsaanissamut suliniutit innuttaasunut iluaqutissiisussat oqaluttuarai. Kiisalu Tromsømi aningaasalersuisarnermik ingerlataqartunik pillersitsineq ataatsimiititaliamit aamma paasisaqarfigineqarpoq, tassungalu atatillugu naalagaaffiup aningaasaateqarfia Folketrygdfondet, aningaasaateqarfiup siunertaa aammalu nunani avannarlerni ingerlatseqatigiiffinnut aningaasaliissutit pillugit ataatsimeeqatigineqarpoq.

Norgep avaanarpasissuanit tikilluaqqulluarneqarneq aammalu misilittakkanik siunissamullu pingaarnersiukkanik ammasumik avitseqatigiiffiusunik paasissutissiiffiulluartunillu ataatsimiinnerit Aningaasaqarnermut Akileraartarnermullu Ataatsimiititaliap qujassutigai.

Paasissutissat tiguneqartut nunaqarfinnik isorliunerusunillu ineriartortitsinermi siunissami naalakkersuinikkut suliassanut atatillugu sakkussatut atorluarneqarnissaat ataatsimiititaliamit naatsorsuutigineqarpoq.

Erik Jensen

Aningaasaqarnermut Akileraartarnermullu Ataatsimiititaliap siulittaasua

Annertunerusumik paasisaqarusukkaanni ataatsimiititaliap siulittaasua oqarasuaammut attavigineqarsinnaavoq +299 53 04 08.