UKA25 Imm. II-mi ulloq 2. februar 2026 immikkut ittumik ataatsimiiffiussaaq

2025-mi ukiakkut ataatsimiinnerup immikkoortuata aappaata aallartinnissaata siuartinneqarnissaannik partiit siulittaasui sinnerlugit Naalakkersuisut Siulittaasuata qinnuteqaataa Siulittaasoqarfiup tigusimavaa.

Inatsisartut ataatsimiittarfianni ulloq 2. februar immikkut ittumik ataatsimiittoqarnissaa Siulittaasoqarfiup akueraa, oqaluuserisassani immikkoortoq ataasiinnaq Nunatta Inissisimanera oqaluuserineqassalluni.

Ataatsimiinneq nal. 11.00 aallartissaaq, Naalakkersuisut Siulittaasuat siulliulluni Nunatta Inissisimanera pillugu paasissutissiissalluni. Partiit oqaaseqartartui minuttini qulini oqaaseqarnissaminnut periarfissinneqassapput, tamatumalu kingorna ilaasortat periarfissinneqassallutik partiit oqaaseqartartuinut pingasunik apeqquteqarnissaminnut.

Oqaluuserisassani allannguutit Inatsisartut nittartagaanni takuneqarsinnaasassapput.

Kim Kielsen

Inatsisartut Siulittaasuat