Inatsisartuni Kukkunersiuinermut Ataatsimiititaliap Københavnimi paasisassarsiorluni angalanera naatsorsuutillu pillugit isumasioqatigiinnera

Kukkunersiuinermut Ataatsimiititaliami amerlanerussuteqartut qanittumi Københavnimi paasisassarsiorlutik angalapput, tassani pisortani naatsorsuutit kukkunersiorneqartarneri, ingerlatseqatigiiffinnik aqutsineq piginnittuunermilu periutsit eqqarsaatigalugit suleriaatsit kiisalu inatsisartoqarnikkut nakkutilliinerit pillugit ingerlaatsinut ilisimasanik annertusaanissaq ataatsimiititaliamit kissaatigineqarluni. Angalanermi Finansministerieqarfiup ataani Center for Konkurrence, Selskaber og Forsyning; Folketingimi Aningaasaqarnermut, Akileraartarnermut aammalu Kalaallit Nunaannut Ataatsimiititaliat; BDO; Naalagaaffimmi Kukkunersiuisut; Aningaasaqarnermut Aqutsisoqarfik kiisalu Statsrevisorerne ataatsimiititaliamit ataatsimeeqatigineqarput.

Ilaatigut nakkutiginninnerit aammalu suliffiit iluini nakkutilliinerit, ingerlatsivinni misissuinernik annerusunik aallartitsinissamut periarfissat kiisalu kukkunersiuinermik suliaqartartut ingerlatseqatigiiffiillu pisortanit pigineqartut aaqqissuussaanerat eqqarsaatigalugit Kalaallit Nunaata Danmarkillu akornanni assigiinngissutsit pillugit eqqartueqatigiinnissamut pulaarnerit pissutissaqartitsipput. Ataatsimeeqatigiinnerit Kukkunersiuinermut Ataatsimiititaliamit pissarsiaqarfiulluarlutillu isumassarsiffiulluarput.

Tamatuma saniatigut Kukkunersiuinermut Ataatsimiititaliap angalanermut iluatsillugu ukiumoortumik naatsorsuutit pillugit isumasioqatigiinneq ingerlappaa, tassani Nunatta Karsiata 2024-mi Naatsorsuutai suliamut ilaallutik. Tamanna sioqqullugu naatsorsuutit pillugit Naalakkersuisumut apeqqutinik aallarniutitut ataatsimiititaliaq suliaqarnikuuvoq. Apeqqutinut taakkununnga akissutit ukiaanerani ataatsimiinnissamut ataatsimiititaliap naatsorsuutinik suliaqarnissaanut piareersaatitut ilanngullugit naatsorsuutit pillugit isumasioqatigiinnermi eqqartorneqarput.

Iddimanngiiu Jensen Bianco

Kukkunersiuinermut Ataatsimiititaliap Siulittaasua

Annertunerusumik paasisaqarusukkaanni ataatsimiititaliap siulittaasua oqarasuaammut attavigineqarsinnaavoq +299 54 88 44