Tusagassiorfinnut nalunaarut 17.01.2024
2023-mi decembarip ulluisa 31-anni Dronning Margrethep ukiortaami oqalugiarneratigut tamatta paasitinneqarpugut 2024-mi januaarip ulluisa 14-ianni Danmarkip dronningiatut tunuarniarluni aalajangersimalluni, tassa kunngeqarfimmi qullersatut ataatani kingoraarlugu inissinneqarnerminit ukiut 52-inngornerat eqqorlugu. Dronningip ilanngullugu paasissutissiissutigaa kunngeqarfimmi qullersatut pissaanini ernerminut Kunngissaq Frederik-mut tunniunniarlugu.
2024-imi januaarip ulluisa 14-ianni Dronningip aalajangernera Københavnimi naalagaaffeqatigiinnilu sumiiffinni arlalippassuarni pisoqarfioqisumik timitalerneqarpoq, kunngimik nutaamik pisortatigoortumik ivertitsineq Christiansborgip illussaarsuata aneersuaartarfianit pilluni Christiansborgillu eqqaanit innuttaasunit aatsaat taamak amerlatigisunit nalliussineqarluni.
Ullormi Ataqqinartorsuup Kunngi Frederik Qulingata kunnginngortinneqarnerani periarfissaqarsimavunga Christiansborgip illussaarsuata akerpiaanit Nunat Avannarliit Siunnersuisoqatigiiffiata allaffiini ataatsimiittarfimmit qamutit matusamik initallit hiistinik qimuttullit Christiansborgip illussaarsuanut apuunnerat illussaarsuullu aneerasaartarfianit ministeriunerup kunngimik nutaamik suaarutiginninnera isiginnaassallugit.
Kunngeqarfimmit tamarmit inuppassuit untritillit pisunik malinnaajartorlutik takkussimasut peqatigalugit malinnaanerput minnerunngitsumillu inuppassuit katersuussimasut kunngimik nutaamik, Dronninginngortumik Marymik kunngikkormiunillu tamanik aneerasaartarfimmi katersuussimasunik, qiimmattarlutik horaarutiginninnerat immikkoorluinnaq misigisaavoq puigugassaanngitsoq.
Januaarip ulluisa 15-ianni folketingip ataatsimiittarfiani folketingip ataatsimiinneranut aamma peqataavunga. Tassani ministeriuneq Mette Frederiksen oqalugiarpoq Ataqqinartorsuaq Kunngi Frederik Qulingannillu folketingimut oqariartuuteqarluni. Periarfissaq tamanna iluatsillugu nunaqqatitsinnit tamanit Kunnginngortumut pilluaqqussut apuuppara.
Pisoq taanna aamma persuarsiornaqalunilu nalliuttorsiorpalaaqisumik ingerlanneqarpoq.
Mimi Karlsen
Inatsisartut Siulittaasuat
Savalimmiuni Lagmand Aksel V. Johannesen (saamerleq), Savalimmiuni Lagtingsforkvinde Bjørt Samuelsen, Inatsisartut Siulittaasuat Mimi Karlsen Naalakkersuisullu Siulittaasuat Muté Bourup Egede (talerperleq) Folketingip ataatsimiittarfiani.
(Asseq: Inatsisartut Allattoqarfiat)
Inatsisartut Siulittaasuat Mimi Karlsen (saamerleq) Nunat Avannarliit Siunnersuisoqatigiiffianni pisortaq Kristina Háfoss (talerperleq) Nunat Avannarliit Siunnersuisoqatigiiffiata illorsuani.
(Asseq: Inatsisartut Allattoqarfiat)
Inatsisartut Siulittaasuat Mimi Karlsen hr. Peter Lyberth peqatigalugu Nunat Avannarliit Siunnersuisoqatigiiffiata illorsuani.
(Asseq: Inatsisartut Allattoqarfiat)
