Inatsisartut Siuliuttaasuat Mimi Karlsen Norgep avannaani Karasjokimi Saamit inatsisartuinut tikeraartoq

Inatsisartut Siulittaasuat ulluni 13. aamma 14. januar 2025 Norgep avannaani Karasjokimi Saamit inatsisartuinut tikeraarpoq saaminik suleqateqarneq saaminullu attaveqarneq nukittorsarniarlugit.

 

Siulittaasoq Saamit inatsisartuisa siulittaasuannik Tom Sottinenimik, Saamit siunnersuisoqatigiiffiata sinniisaanik Maja Kristine Jåmamik kiisalu Karasjokip borgmesterianik Svein Atle Sombymik naapeqateqarpoq.

 

Inatsisartut Siulittaasuat tikeraarneq pillugu oqaaseqarpoq:

 

”Kalaallit Nunaanni Inatsisartunut Saamit inuuniarnikkut atugarisaat naalakkersuinikkullu ineriartornerat ingerlaavartumik malinnaavigissallugu Kalaallit Nunaanni Inatsisartunut pingaaruteqartuarsimavoq pingaaruteqartuassallunilu.

Inatsisartutigoortumik sulinermut avatangiisitigut atugassarititaasut pitsanngorsarneqarnissaannik Inatsisartut ukiorpassuarni kissaateqarsimanerat eqqarsaatigalugu Saamit inatsisartuinut tikeraarneq taamatuttaaq isumassanik aallerfiusimavoq, minnerunngitsumik ataatsimiittarfeqarnikkut avatangiisit kusanartut eqqarsaatigalugit.

 

Kalaallit Nunaanni inatsisartut 31-nik Norgemilu saamit inatsisartui 39-nik ilaasortaqarput, taamaalillutillu aamma sanilliukkuminarnerullutik, isumassarsiorfiginissaq misilittaanikkullu paarlaasseqatigiittarnissaq eqqarsaatigalugit.

 

Karasjokimut tikeraarninni ullutsinni Kalaallit Nunaata annertuumik sammineqarnera eqqarsaatigalugu Norgemi tusagassiorfinnit aamma attaveqarfigineqallattaarpunga, tamatumunngalu atatillugu suliassaq pillugu Naalakkersuisut oqaaseqaataat uteqqillugu erseqqissaateqarfigisarlugu:

 

” Kalaallit Nunaat kalaallit pigaat – Kalaallillu Nunaata ineriartornera siunissaalu taamaallaat inuiannit kalaallinit aalajangerneqassaaq. Namminiilivinnissamik sorsuutiginninneq kalaallit oqartussaaffigaat. Siunissarput uagut nammineq aalajangigassaralugulu ilusilersugassaraarput. Inuiattut nammineertutut pisinnaatitaaffivut ilisimaaraagut.

Naalagaaffiit nunallu Kalaallit Nunaannik suleqatiginninnerunissamik soqutigisaqarnissamut tikilluaqqusaapput.”

 

Saamit inatsisartuinut tikeraarneq taamaalilluni piffissami kingullermi nunarsuaq tamakkerlugu Kalaallit Nunaata annertuumik sammineqalernera sioqquterujussuarlugu pilersaarusiorneqarsimavoq tamatumalu uppernarsarpaa inuiannik allanik pitsaasumik suleqateqarnivut piffissallu ingerlanerani ineriartortissimasagut pingaartittuartariaqaratsigit annertusarlugillu. Kalaallit Nunaat Saamillu taamaalillutik aamma ataatsimoorfippassuaqarput nunagisatsinni inuuniarnikkut atugarisanik paasisaqarnissamik pissusissamisoortumik soqutiginnilersitsisunik. Issittormiuuvugut, ulluinnarni inuunitsinnut pinngortitaq pingaaruteqarluinnarluni akunnitsinnilu ataatsimoornermik pilersitsisarluni. Pinngortitap tunniussinnaasaanik pisuussuterpassuaqarpugut, uumassusilinnik uumaatsunillu, taakkununnga tuttu ilanngullugu, ulluinnarninni inuunitsinnut pingaaruteqartunut aamma ilaasumik.

 

Oqaluttuarisaaneq eqqarsaatigalugu saamillu assigiissuteqarpassuaqarpugut, tamatta nunasiaataasimalluta inuiaqatigiittut ineriartornitsinnut sunniuteqarsimasumik. Nunatsinni innuttaasut naggueqativullu nunat assigiinngitsut killeqarfii pitarlugit siammarsimavugut piffissap ingerlanerani kulturivut oqaluttuarisaanivullu illersorniarlugit annertuumik sorsuuteqartariaqarsimasut.

 

Taamaattumik aamma tikeraarnera attaveqaqatigiittarnitta suli piujuartinneqarlunilu ineriartortinneqarnissaanik kissaateqarnermik inuiaqatigiillu inuuffigisatta ineriartortinneqarnissaannik aamma oqaatsitta, oqaluttuarisaanitta kulturikkullu kingornussatta piujuartinneqarnissaannik ataatsimut kissaatigisatsinnik piumasaqaatitsinnillu ersersitsineruvoq.”

 

Tikeraarnermi Karasjokip kommuniata borgmesteria taamatuttaaq Saamit katersugaasiviannut qaaqqusivoq, tassanilu ilaatigut saamit qilaataat ukiunik 400-nik pisoqaassusilik saamit kulturiannut pingaarutilik Danmarkimiillu 2022-mi utertinneqartoq takutinneqarluni.

 

Inatsisartut Siulittaasuata taamatuttaaq kommune Karasjokip sanilerisaa Kautokeino tikeraarpaa kalaallinillu taakani najugalinnik Karasjokimi najugallip Marit Kirsten Guttorm-ip aaqqissugaanik ilaatigut naapeqateqarluni.

Karasjokimi tikeraarnerup kalaallit saamillu akornanni ataatsimoorfippassuaqarnera takutippaa – ataatsimoorfippassuit piffissap ingerlanerani kalaallit saamillu akornanni naalakkersuinikkullu suleqatigiinnermi piusimasut taamaattuartussallu.