Inatsisartut Siulittaasuata Mimi Karlsenip ulloq 8. november 2024 Rebekka Olsvig Nuummi sølviusumik Nersornaaserpaa

 

Inatsisartut Siulittaasuata Mimi Karlsenip Nuummi Hans Egedep Illuani nalliuttorsiualaarnermi Rebekka Olsvig sølviusumik Nersornaaserpaa.

 

Rebekka Olsvig sølviusumik Nersornaaserneqarpoq Nuummi najukkami inuiaqatigiinni piorsarsimassutsikkut peqatigiiffilerinermi annertuumik ukiorpassuarnilu tunniusimalluni suliaqarsimanera pissutigalugu.

 

Inatsisartut Siulittaasuata Rebekka Olsvigimut oqaaseqarnermini ilaatigut erseqqissarpai:

 

“Najukkami inuiaqatigiinnut tunniusimallutit peqataajuarnikkut illoqarfiup inuuneranut katattussaanngitsumik tunniussaqarsimavutit kattuffilerinermilu timitalimmik suliniuteqartarnikkut peqataassagaanni ataatsimoornerup ataqqeqatigiinnerullu pingaaruteqassusiinik ilinniartissimallugit.

 

Ukiorpassuarni qasusuilluinnarlutit aalisartut piniartullu taamatullu ilaqutariit pissakinnerusut uummateqarfigalugit sullissimavatit, soorlu aamma pissusissamisuuginnartoq inuiaqatigiinnik sullisserusunnerit ingerlatiinnarit.

 

Nunatsinnut takornariat tikittut angerlarsimaffinnut tikilluaqqullugit isertittarpatit, tassani pingaartitarigakku kalaallit nunatsinni qanoq inooriaaseqarnerput kusanartumik nunarsuarmioqatitsinnut nittarsaatissallugu. 

 

Rebekka Olsvig, suliassaqartitsinermi annertuumik piumassuseqartuunerit inuppassuarnit nuannaartorineqartarpoq, inuttullu allanngujaatsutut, inuiaqatigiinnilu allanngueqataanissarnut piumassuseqarluartutut, alapernaatsutullu ilisarisimaneqarputit.

 

Akuuffigisimasatit peqataaffigisimasatillu amerlaqalutillu assigiinngeqaat, tamarmillu maani nalliuttorsiualaarnermi taaneqarsinnaagunaratik”. 

 

 

Siulittaasoqarfik sinnerlugu

Inatsisartut Siulittaasuat Mimi Karlsen