Aalisarneq pillugu Inatsisartut inatsisissaattut siunnersuummut isumaliutissiissutip kinguartinneqarnera

Aalisarneq pillugu Inatsisartut inatsisissaattut siunnersuut Aalisarnermut, Piniarnermut Nunalerinermullu Ataatsimiititaliami suliarineqarpoq. Siunnersuutip aappassaaneerneqarnissaa pilersaarutit malillugit tallimanngornermi ulloq 10. maj 2024-mi pissaaq. Taamaalilluni ataatsimiititaliap ulloq 7. maj, nal. 12, isumaliutissiissutini tunniuttussaavaa. Ataatsimiititaliap isumaliutissiissutaata tunniunneqarnissaanut piffissaritinneqartoq pillugu immikkut ittumik akuerineqarnissamik ataatsimiititaliaq Inatsisartut Siulittaasoqarfiannut qinnuteqaqqammerpoq. Partiit inaarutaasumik oqaaseqaatissaasa isumaliutissiissummut ilanngunneqarnissaat pillugu tamanna pivoq. Ataatsimiititaliap isumaliutissiissutaa ullumi 7. maj kingusinnerusukkut tunniunneqassaaq. 

Kristian Jeremiassen

Aalisarnermut, Piniarnermut Nunalerinermullu Ataatsimiititaliap siulittaasua

Paasissutissat sukumiinerusut ataatsimiititaliap Siulittaasua angallattagaq +299 54 35 76-imut  attaveqarfigalugu pissarsiarineqarsinnaapput