Inatsisartut Siulittaasuata Mimi Karlsenip ulloq 4. juni 2024 Københavnimi Amalienborgimi nalliuttorsiualaarnermi Ataqqinartorsuaq Dronning Mary kuultiusumik Nersornaaserpaa

 

Inatsisartut Siulittaasuata Mimi Karlsenip Københavnimi Amalienborgimi nalliuttorsiualaarnermi Ataqqinartorsuaq Dronning Mary kuultiusumik Nersornaaserpaa.

 

Inatsisartut Siulittaasuata Ataqqinartorsuarmut Dronning Marymut oqaaseqarnermini ilaatigut tulliuttut erseqqissarpai:

 

”Kalaallit Nunaannit Inatsisartut sinnerlugit ukioq manna januaarip ulluisa 14-ianni kunngeqarfik tamaat peqatigalugu maani Københavnimit Christiansborgillu illussaarsuata saavani nuannersumik isiginnaakkatsinnik kunngip nuliatut Dronningitut inissisimalerninnik pilluaqquakkit.

 

Tamanna pissutigalugu Inatsisartut Siulittaasoqarfiata kuultiusumik Nersornaaserneqarnissat kissaatigisimavaa.

 

Siulittaasoqarfiup kuultiusumik Nersornaaserpaatsit Kalaallit Nunaanni inuiaqatigiinni ajornartorsiutit annertuut, soorlu meeqqat inuusuttullu inuttut atugarisaat qulequttallu allat paquminarsinnaasut eqqarsaatigalugit ukiorpassuarni annertuumik inuttullu pimoorussisarsimanitit pissutigalugit.

 

Ataqqinartorsuaq Dronning Mary, kunngissap nuliatut maannalu kunngip nuliatut atuunninni, meeqqat akornanni pimmatiginnittarneq akiorniarlugu suliniuteqarnermi qulequttanilu paquminarsinnaasuni allani, soorlu inuttut aliasuuteqarnernik suliarinninniarnerni imaannaanngissinnaasuni, pimoorussilluartarnerit takutissimavat.

 

Ataqqinartorsuaq Dronning Mary, qulequttat imaannaanngissinnaasut paqumiginagit sammisarpatit taamaaliornikkullu kissalaarnikkut, oqaasertaliisarnikkut, peqataatitsisarnikkut paasinnittarnikkullu qulequttat imaannaanngissinnaasut eqqartoruminarnerulersittarlugit.”

 

 

Siulittaasoqarfik sinnerlugu

Inatsisartut Siulittaasuat Mimi Karlsen