Aningaasaqarnermut Akileraartarnermullu Ataatsimiititaliap Attassiinnarnissamut Ineriar­tortitsinissamullu pilersaarut 2 pillugu ilisimatitsiffiusumik ataasinngornermi 8. april 2024, nal. 10.00, ammasumik ataatsimiinnissamut aggeqqusissutaa

Attassiinnarnissamut Ineriartortitsinissamullu pilersaarut 2 pillugu ilisimatitsiffiusumik ammasumik ataatsimiinnissamut Aningaasaqarnermut Akileraartarnermullu Naalakkersuisoq Aningaasaqarner­mut Akileraartarnermullu Ataatsimiititaliamit matumuuna aggersarneqarpoq. Aaqqissuusseqqin­nissamut sammivinnut sisamanut ataatsimoortumik pilersaarut taamatullu sammivinnut sisamanut ataasiakkaanut immikkut pilersaarutit Attassiinnarnissamut Ineriartortitsinissamullu pilersaarut 2-mi allassimasut ataatsimiinnermi oqallinnermut aallaaviunissaat ataatsimiititaliamit kissaatigineqarpoq:

Aaqqissuusseqqinnissamut sammivik 1 - Ilinniartitaanerit piginnaasallu qaffassusiisa qaffanneri.

Aaqqissuusseqqinnissamut sammivik 2 - Piujuartitsisumik siuariartorneq, aamma aningaasatigut arlalinnik sammivilimmut ikaarsaariarneq

Aaqqissuusseqqinnissamut sammivik 3 - Pisortanik siunissamut qularnaarineq

Aaqqissuusseqqinnissamut sammivik 4 - Akileraartitsinermik aaqqiissummik, atugarissaarfimmi ikiorsiissutinik, inissiaqarnermi utoqqarnillu suliassaqarfimmi aaqqissuusseqqinnerit

Anguniakkat pingaarnerit aaqqissuusseqqinnissamut sammiviit sisamat pineqartut aqqutigalugit anguniarneqartut ukuusut Attassiinnarnissamut Ineriartortitsinissamullu pilersaarut 2-mi paasissu­tissiissutigineqarpoq:

• pisortat immikkoortuani aningaasartuutit qaffasissusaat malunnartumik annikillisinneqassasut aamma/imaluunniit
• paarlattuanik ilaatigut pisortat immikkoortuani suliassaqartitsinerunerit pilersinnerisigut pisortat isertitaat annertusillugit kiisalu
• sulisinnaassuseqartut amerlisillugit aammalu tassunga peqatigitillugu inuiaqatigiinni piitsuussusermut ajornartorsiutaasut annikinnerulernissaat tapeeqataaffigalugit.

Iliuusissat, aaqqissusseqqinnissami sammivinni allassimasut, tigussaasumik piviusunngortinniarlugit Naalakkersuisut sulinerannik, tassungalu ilanngullugu piviusunngortitsinissap aaqqissuunneqarne­rani piffissaliussanik pilersaarutinillu kiisalu Attassiinnarnissamut Ineriartortitsinissamullu piler­saarut 2-p piviusunngortinneqarnissaanut sulisutigut nukissat Naalakkersuisunit pisariaqar­tinneqartutut nalilerneqartunik, ataatsimiinnermi saqqummiivigineqarnissaq ataatsimiititaliamit kissaatigineqarpoq. Kiisalu aaqqissuusseqqinnissamut sammiviit qanoq tulleriinnilersorlugit piviusunngortinneqarnissaat itisilerneqassasoq ataatsimiititaliamit kissaatigineqarpoq.

Ilisimatitsiffiusumik ataatsimiinnermi malitseqartitsissutinik apeqquteqartarnissaq ataatsimiititalia­mit naatsorsuutigineqarpoq.

Aningaasaqarnikkut patajaatsumik aammalu inuuniarnikkut oqimaaqatigiissaarluakkamik ineriartor­titsinissap qulakkeerneqarnissaanut Attassiinnarnissamut Ineriartortitsinissamullu pilersaarut 2 piareersaatitut atorluarsinnaasutut ataatsimiititaliamit isigineqarpoq. Aaqqissuusseqqinneq annertooq ataqatigiissorlu anguniarneqarpoq. Tamatumani immikkoortukkaartunik ersarissunik anguniaga­lersornissaq aammalu naalakkersuinikkut suliallit malinnilluarlutillu partiit akimorlugit sule­qatigiinnissaq pisariaqarpoq. Aaqqissuusseqqinnermik sulineq Aningaasaqarnermut Ataatsimiiti­taliamit tapersersorumaneqarpoq aammalu Naalakkersuisut ingerlaavartumik oqaloqatigine­qartarnissaat kissaatigineqarluni.

Ilisimatitsiffiusumik ammasumik ataatsimiinnissaq Inatsisartut ataatsimiittarfianni Erling Høeghimi ingerlanneqassaaq tusarnaarianullu ammalluni. Tusarnaariat 15-it tikillugit ilisimatitsiffiusumik ammasumik ataatsimiinnissamut peqataanissaannut periarfissaqarpoq. Tamatuma saniatigut tusagassiortunut inissat tallimat inniminnerneqarput. Inissat siulliuniunneq malillugu tunniunneqassapput inatsisartut@inatsisartut.gl-imut saaffiginnilluni imaluunniit 34 50 00-imut sianerluni Inatsisartut Allattoqarfiannut attaveqarnikkut.

Ilisimatitsiffiusumik ammasumik ataatsimiinnissamut tusarnaarniaraanni inissamik siumoortumik inniminniisoqartariaqarpoq. Tusarnaariat Inatsisartunut saaffiginnittarfimmut saaffiginnissapput kingusinnerpaamik ilisimatitsiffiusumik ammasumik ataatsimiinnissap aallartinnissaa 15 minutsit sioqqullugu.

Ataatsimiinnissamut kalaallisut qallunaatullu malinnaavigineqarsinnaassaaq.

Inussiarnersumik inuulluaqqusillunga

Asii Chemnitz Narup

Aningaasaqarnermut Akileraartarnermullu Ataatsimiititaliaq Siulittaasoq