Tusagassiorfinnut nalunaarut 01.07.2025
Inatsisartut Allattoqarfianni pisortaq nutaaq
Steen Lynge Inatsisartut Allattoqarfianni pisortanngussaaq.
Inatsisartut Siulittaasoqarfiat Inatsisartut Allattoqarfiannut pisortassamik toqqaaqqammerput.
Kalaallit Nunaanni inatsisartutigoortumik sulineq Inatsisartullu Allattoqarfiat suliffeqarfittut soqutigineqartorujussuuvoq qinnuteqartorpassuit takutippaat.
Pisortanngortussaq tassaavoq Steen Lynge, ullumikkut Naalakkersuisut qitiusumik allaffeqarfissuanni suliffeqarnermut ilinniartitaanermullu immikkoortortami pisortaasoq. Steen Lynge taamaalilluni ilaatigut pisortat ingerlatsiviinit allaffissornermik misilittagaqarluarpoq Inatsisartunilu inatsisartutigoortumik sulinermik ilisimasaqarluarluni.
Steen Lynge 61-inik ukioqarpoq Nuummilu najugaqarluni. Ulloq 1. august 2025 atorfissaminut inississaaq Inatsisartut Allattoqarfianni ukiorpassuarni pisortaasimasoq Ellen Kolby Chemnitz soraarninngorsimasoq kingoraarlugu.
Kim Kielsen
Inatsisartut Siulittaasuat