Qinersisoqarnissaanik nalunaaruteqartoqarneq

Maannalu ulloq 11. marts 2025 qinersisoqassasoq nalunaarutigineqarpoq, taamaattumillu Inatsisartut inatsisartutigoortumik sulinerat unippoq qinersisoqartussanngorporlu.

Tamatuma kinguneraa ataatsimiititaliani sulineq tamarmi unittoq. Taamaattorli Aningaasaqarnermut Ataatsimiititaliaq aammalu Nunanut Allanut Sillimaniarnermullu Ataatsimiititaliaq pisuni immikkorluinnaq ittuni sulianik Naalakkersuisuneersunik kinguartinneqarsinnaanngitsunik nukinginnartunillu suliarinninniarlutik ataatsimiissinnaapput. Tamatuma aamma kinguneraa Inatsisartunut ilaasortat maannamiit § 37 naapertorlugu Naalakkersuisunut apeqquteqarsinnaajunnaarmata.

Qinersisoqareerpat Inatsisartut siulittaasuata tunuartup Inatsisartuni sivisunerpaamik ilaasortaasimalluni Inatsisartunut nutaamik siulittaasunngortoq tikilluaqqussavaa. Siulittaasoq Inatsisartunut sivisunerpaamik ilaasortaasimasoq siulittaasumik nutaamik qinersinissap tungaanut Inatsisartunut siulittaasutut atuutissaaq, taassumalu suliassarissavaa Inatsisartunut qinigaarlaanut aggeqqusissutissap aammalu inissitsiterluni ataatsimiinnissap piareersarnissaat.

Inatsisartunut ilaasortatut qinerneqartut inissitsiterluni ataatsimiinnissamut piaarnerpaamik kingusinnerpaamillu qinersinerup kingorna ullut 45-t qaangiunneranni aggersarneqassapput. Tamanna sioqqullugu qinersinermit allattaavik naammassereersimassaaq, tassanilu allassimassallutik inuit kikkut qinigaanersut. Aggersaaneq sivisunerpaamik ilaasortaasimasup sulissuteqarneratigut pissaaq, tamannalu pissalluni Naalakkersuisunngortussat pisariaqartumik amerlanerussuteqartunik tunuliaqutserneqarnerannik sivisunerpaamik ilaasortaasimasoq nalunaarfigineqarpat – tamannalu naalakkersuisooqatigiinnissamik isumaqatigiissuteqartoqareernerani nalinginnaasumik pisarpoq.

Aggersaanermi ilaasortat qinigaarlaat Nuummut apuussinnaanissaat qulakkeerneqassaaq, soorluttaaq pinerluuteqarsimasunik nalunaarsuiffimmi allattugaatit tunngavigalugit ilaasortat qinigaasut qinigaasinnaanerat pillugu Inatsisartut isummerfiginninnissaannut pisariaqartumik piffissaqartinneqassasut.

Taamaalillunilu sivisunerpaamik ilaasortaasimasutut siulittaasup Inatsisartut qinigaarlaat sinnerlugit suliassaasa siulliit ilagissavaat Qinigaanerup Misilinneqarnissaanut Ataatsimiititaliaagallartumik pilersitsinissaq, tassani partiit sapinngisamik tamarmik ilaasortaatitaqassapput. Ataatsimiititaliaq ilaasortat qinigaasut qinigaasinnaanerat pillugu Inatsisartunut inassuteqassaaq.

Kiisalu sivisunerpaamik ilaasortaasimasutut siulittaasoq ilaasortat marluk Inatsisartunit toqqarneqarsimasut peqatigalugit oqaluuserisassanut ataatsimiititaliaagallartutut atuutissapput aammalu siulittaasumik Inatsisartullu Siulittaasoqarfiannik nutaanik qinersisoqarnissaata tungaanut Inatsisartut ataatsimiinneranni oqaluuserisassanik suliaqarlutillu aalajangersaassallutik.

Siulittaasorqarfiup qineqqusaarluarnissassinnik tamassi kissaappassi.