Kalaallit Nunaat Nunat Avannarliit Siunnersuisoqatigiiffiannit sakkortuumik taperserneqarpoq

Nunat Avannarliit Siunnersuisoqatigiiffiata siulittaasoqarfia inuiannik kalaallinik taakkulu saneqqunneqarsinnaanngitsumik namminneq nunaminnut siunissaminnullu sanioqqunneqarsinnaanngitsumik aalajangiisinnaassuseqarnerannik sakkortuumik piumasaqaatitaqanngitsumillu tapersiivoq. Tamanna inuiaqatigiit namminersortut akornanni inatsiseqartitsinermi tunngaviuvoq saneqqunneqarsinnaanngitsoq.

Nunat Avannarliit Siunnersuisoqatigiiffiata siulittaasoqarfia ulloq 31. marts oqaaseqaat tulliuttoq akuersissutigaat:

Nunat Avannarliit Siunnersuisoqatigiiffiata siulittaasoqarfiat inuiannik kalaallinik taakkulu saneqqunneqarsinnaanngitsumik nammineq nunaminnut siunissaminnullu sanioqqunneqarsinnaanngitsumik aalajangiisinnaassuseqarnerannik sakkortuumik piumasaqaatitaqanngitsumillu tapersiivoq. Tamanna inuiaqatigiit namminersortut akornanni inatsiseqartitsinermi tunngaviuvoq saneqqunneqarsinnaanngitsoq.

Nunat Avannarliit Siunnersuisoqatigiiffiata siulittaasuata 2025-mi januaarip ulluisa 15-ianni oqaatigaa Kalaallit Nunaata siunissaa inuiannit kalaallinit aalajangerneqassasoq. Oqariartuut tamanna ullumikkut sakkortusisamik uteqqipparput. Kalaallit Nunaat nunat avannaamioqatigiit nunallu avannarliit suleqatigiinnerannut ilaavoq pingaarutilik.

Kalaallit Nunaat Danmarkilu Savalimmiut peqatigalugit naalagaaffeqatigiipput USA-lu qanimut iligalugu. Kalaallit Nunaata Danmarkillu arlaleriarlutik oqaatigisareerpaat Issittumi sumiiffinnilu allani sillimaniarneq eqqarsaatigalugu USA-mik suleqateqarnerup nukittorsarneqarnissaa kissaatigalugu.

Nunat avannarliit tamarmik maanna NATO-mut ilaasortanngorsimalerput, nunallu tamarmik sillimaniarnikkut, kulturikkut aningaasaqarniarnikkullu USA-mut atassuteqarlutik sakkortuunik. Taamatuttaaq USA-mi innuttaasut amerlasuut nunanilu avannarlerni innuttaasut akornanni ilaqutaqarnikkut atassutit nukittuujupput.

USA-mik suleqateqarneq nukittorsarniarlugu iliuuserisinnaasavut iliuuserissavagut, tamannali naalagaaffiit killeqarfiisa innarlitsaalineqarnissaannik, nunagisaminnut tamakkiisumik oqartussaassuseqarnerannik innuttaasullu oqartussaaqataanerannut tunngaviusunik ataqqinninnermik tunngaveqartariaqarpoq.

Nunat Avannarliit Siunnersuisoqatigiiffiat nunani avannarlerni inatsisartut akornanni pisortatigoortumik suleqatigiiffiuvoq. 1952-imi pilersinneqarpoq, Danmarkimit, Finlandimit, Islandimit, Kalaallit Nunaannit, Norgemit, Savalimmiunit, Sverigemit Ålandimiillu qinikkanik 87-inik ilaasortaqarluni.