
Nutaarsiassaq 01.04.2025
2025-mi inissitsiterfiusumik ataatsimiinnissaq ullulerneqarpoq
Inatsisartut oqaluuserisassanut ataatsimiititaliarigallagaata maanna 2025-mi inissitsiterfiusumik ataatsimiinneq qaqugu pissanersoq ulluleqqammerpaa.
Oqaluuserisassanut ataatsimiititaliaagallartup ukuninnga ilaasortaqartup:
Inatsisartunut sivisunerpaamik ilaasortaasimasoq Hans Enoksen (N)
Jens-Frederik Nielsen (D)
Pele Broberg (N)
Múte B. Egede (lA)
Vivian Motzfeldt (S)
Aqqalu C. Jerimiassen (A)
ulloq 31. marts 2025 aalajangerpaa inissitsiterfiusumik ataatsimiinneq ataasinngornermi ulloq 7. april 2025 pissasoq.
Inatsisartunut nutaamik qinigaasut taamaalillutik inissitsiterfiusumik ataatsimiinnermut ataatsimiigiaqquneqarput, tamarmillu sapaatip akunnerani uani Nuummut apuutereersimanissaat naatsorsuutigineqarluni.
Oqaluuserisassanut ataatsimiititaliaagallartoq piffissami qaninnermi inissitsiterluni ataatsimiinnermut oqaluuserisassanik aalajangersaassaaq Inatsisartut nittartagaanni takuneqarsinnaasussamik. Ullormut inissitsiterfiusumik ataatsimiiffiusumut pisussanut pilersaarut aamma takuneqarsinnaassaaq.
Ikinngutinnersumik inuulluaqqusillunga
Hans Enoksen
Inatsisartunut sivisunerpaamik ilaasortaasimasoq