Nunat Avannarliit Siunnersuisoqatigiiffiata Pinngortitamut Avatangiisinullu tunngatillugu nersornaasiuttakkani, danskit koruuninngorlugit 350.000-inik aningaasartalik, aappaagu 18-issaa tunniutissavaa. Nunat Avannarliit Siunnersuisoqatigiiffiata Pinngortitamut Avatangiisinullu tunngatillugu nersornaasiuttagaa 2012-mi uumassusillit assigiinngisitaarnerannik piujuaannartitsinermut sammitinneqassaaq.

 

Nersornaasiuttagaq 2012-mi tunniunneqassaaq nunani avannarlerni suliffeqarfimmut, suliniaqatigiiffimmut inummulluuniit ataatsimut uumassusillit assigiinngisitaarnerat nukittorsarniarlugu tamatumaluunniit innuttaasut akornanni ilisimaneqarnerata annertusarneqarnissaanik suliniuteqarsimasumut.

 

Nersornaaserneqartussaq Naalagaaffiit Peqatigiit nunarsuaq tamakkerlugu uumassusillit assigiinngisitaarnerat pillugu ullorititaanni maajip ulluisa 22-ianni 2012 nalunaarutigineqassaaq. Nersornaasiuttagaq Nunat Avannarliit Siunnersuisoqatigiiffiata ukiumoortumik ataatsimiinneranni oktobarip naalernerani Helsingforsimi pisussami tunniunneqassaaq.

 

Kikkut tamarmik inunninnik suliffeqarfinnilluunniit piukkussaminnik nersornaasigassanik inassuteqarsinnaapput. Inassuteqarniaruit inassuteqaatit ulloq 12. december 2011 tunniutereersimasaavat.

 

2011-imi Nunat Avannarliit Siunnersuisoqatigiiffiata Pinngortitamut Avatangiisinullu tunngatillugu nersornaasiuttagaa piujuaannartitsinermik tunngavilimmik takornarniartitsisarneq siuarsarlugu suliniuteqarneranut akunnittarfiutileqatigiiffimmut Scandicimut tunniunneqarpoq.

 

Nunat Avannarliit Siunnersuisoqatigiiffiata 2012-mut Pinngortitamut Avatangiisinullu tunngatillugu nersornaasiutassaa pillugu paasissutissat sukumiinerusut piumasaqaatillu nittartakkami www.norden.org/miljøprisen-imi pissarsiarineqarsinnaapput. Tassani aamma inassuteqarluni immersuivissaq aaneqarsinnaavoq.

  

Paasissutissat sukumiinerusut aallartitat allattaat Jakob Hartmann jhh@inatsisartut.gl attaveqarfigalugu pissarsiarineqarsinnaapput.